መንበረ ፓትርያርክ ቅድስተ ቅዱሳን ማርያም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ገነተ ጽጌ ቅ/ጊዮርጊስ

የምዕራብና የደቡብ አዲስ አበባ አህጉረ ስብከት ሊቀ ጳጳስ

ቦሌ ደብረ ሳሌም መድኃኔዓለም

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ ጸባዖት ቅድስት ስላሴ ካቴድራል

የምዕራብና የደቡብ አዲስ አበባ አህጉረ ስብከት ሊቀ ጳጳስ

ርዕሰ አድባራት መንበረ ፀሐይ እንጦጦ ማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ምስካየ ኅዙናን መድኃኔኃለም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ታዕካ ነገሥት በዓታ ለማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ጽጌ ቅድስ ኡራኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ መንግሥት ቅ/ገብርኤል ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ኃይል ራጉኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

http://www.addisababa.eotc-churches.org/site/components/com_gk2_photoslide/images/thumbm/590538kidste_mariam.jpg http://www.addisababa.eotc-churches.org/site/components/com_gk2_photoslide/images/thumbm/895720giorgis.jpg http://www.addisababa.eotc-churches.org/site/components/com_gk2_photoslide/images/thumbm/903816bole_medhaniealem.jpg http://www.addisababa.eotc-churches.org/site/components/com_gk2_photoslide/images/thumbm/683566trinity.jpg http://www.addisababa.eotc-churches.org/site/components/com_gk2_photoslide/images/thumbm/821897entoto_mariam.jpg http://www.addisababa.eotc-churches.org/site/components/com_gk2_photoslide/images/thumbm/310283meskaye_1.jpg http://www.addisababa.eotc-churches.org/site/components/com_gk2_photoslide/images/thumbm/904160BEATA_MARIAM.jpg http://www.addisababa.eotc-churches.org/site/components/com_gk2_photoslide/images/thumbm/578084urael.jpg http://www.addisababa.eotc-churches.org/site/components/com_gk2_photoslide/images/thumbm/812647gebrie_gedam.jpg http://www.addisababa.eotc-churches.org/site/components/com_gk2_photoslide/images/thumbm/681179raguel.jpg
ብፁዕ ወቅዱስ አቡነ ማትያስ ቀዳማዊ ፓትርያርክ የ2010 ዓ.ም ዘመን መለወጫን አስመልክተው መልእክት አስተላለፉ

pp009

ቃለ በረከት ዘብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት ዘተናገረ በበዓለ ርእሰ ዐውደ ዓመት ዘዕሥራ ምእት ወዐሠርቱ ዓመተ ምሕረት
በስመ አብ ወወልድ ወመንፈስ ቅዱስ አሐዱ አምላክ አሜን
•በአገራችን በኢትዮጵያ በገጠርና በከተማ የምትኖሩ፤
•ከአገር ውጭ በተለያዩ አህጉር የምትገኙ
•የአገራችንን ዳር ድንበር ለመጠበቅና ለማስከበር በየጠረፉ የቆማችሁ፤
•በሕመም ምክንያት በየጠበሉና በየሆስፒታሉ ያላችሁ፤
•እንደዚሁም የሕግ ታራሚዎች ኾናችሁ በየማረሚያ ቤተ የምትገኙ ኢትዮጵያውያንና ኢትዮጵያውያት፤
የዘመናትና የፍጥረታት ፈጣሪ የኾነው እግዚአብሔር አምላካችን እንኳን ከዘመነ ማቴዎስ ሁለት ሺሕ ዘጠኝ ዓመተ ምሕረት ወደ ዘመነ ማርቆስ ሁለት ሺሕ ዐሥር ዓመተ ምሕረት በሰላም አደረሳችሁ፡፡
“አንሶስዉ እንዘ ብክሙ ብርሃን፤ ብርሃን ሳለላችሁ በብርሃን ተመላለሱ” (ዮሐ. ፲፪፥፴፭)
የብርሃን ጸጋ ለሰው ልጆች ወይም በአጠቃላይ ለፍጥረታት ዅሉ ከተሰጠው የእግዚአብሔር ስጦታዎች ትልቁ ነው፤ ብርሃን የሥራ መሣሪያ ነው፤ ብርሃን የመልካም ነገር ሁሉ ተምሳሌት ነው፡፡ እግዚአብሔር ራሱ በባሕርዩ ብርሃን ከመኾኑም ሌላ በእርሱ ዘንድ የማይጠፋ ብርሃን እንዳለ በቅዱስ መጽሐፍ ተገልጿል፡፡ የሰው ልጅ ከወዲያ ወዲህ፣ ከወዲህ ወዲያ ተንቀሳቅሶ፣ ነግዶ፣ አርሶ፣ ሠርቶ፣ ተምሮና አስተምሮ ለኑሮው የሚያስፈልገውን ዅሉ ለማግኘት ብርሃን የግድ ያስፈልጋል፡፡
ከዚኽም ጋር ሙሉ ጤና፣ ቀና የኾነ አእምሮ፣ ሰላምና ፍቅር ለሰው ልጅ ብልጽግና ወሳኝ ቦታ አላቸው፡፡ እነዚህ በሰው ልጅ መንፈሳዊና ሥጋዊ ሕይወት ላይ ያላቸው ጸጋ እጅግ የላቀ በመኾኑ በቅዱስ መጽሐፍ አገላለጽ ብርሃን እየተባሉ ይጠቀሳሉ፡፡ እንደዚሁም ዕድሜና መልካም ዘመን በተመሳሳይ አገላለጽ ብርሃን ተብሎ ይመሠጠራል፡፡ ምክንያቱም ብርሃን በሌለበት ኹኔታ ምንም ሥራ መሥራት እንደማይቻል ሰላማዊ ዘመን ከሌለም ልማትና ዕድገት ማስመዝገብ አይቻልማና ነው፡፡ በመኾኑም ዕድሜና ዘመንም ሌላው ታላቁ የእግዚአብሔር ብርሃን ነው፡፡
ጌታችን መድኃኒታችን ኢየሱስ ክርስቶስ “ብርሃን ሳለላችሁ በብርሃን ተመላለሱ” ሲል የዕድሜና የጊዜ ብርሃንነትን ማመልከቱ እንደ ኾነ ዐውደ ምንባቡ በግልጽ ያሳያል፡፡ ምክንያቱም እርሱ በዚኽ ዓለም በመምህርነት የተገለጸበት ዘመን ወደ መጠናቀቁ እየተቃረበ በነበረበት ጊዜ የተናገረው ከመኾኑ ጋር ባለችው አጭር ጊዜ የትምህርት ዕድሜ ወይም ዘመን ሰዎች በእርሱ ብርሃንነት እንዲያም የቀሰቀሰበትና ያስተማረበት ትምህርት ነው፡፡ በእርግጥም ላስተዋለውና በሥራ ለተጠቀመበት ጊዜ ታላቁ ብርሃን ነው፡፡ ጊዜ ሲቀና ነገሩ ዅሉ ብርሃን ይኾናል፡፡ ጊዜው ከጨለመ ደግሞ ዙሪያው ዅሉ ጨለማ ይኾናል፡፡
የተወደዳችሁ የመንፈስ ቅዱስ ልጆቻችን ኢትዮጵያውያንና ኢትዮጵያውያት
ዕድሜያችን ወይም ዘመናችን በሕይወታችን ውስጥ ለልማትም ኾነ ለጥፋት፣ ለጽድቅም ኾነ ለኀጢአት፣ ለትንሣኤም ኾነ ለውድቀት መሣሪያነቱ የታወቀ ነው፡፡ ምክንያቱም ዅሉም የሚሠራውና የሚከናወነው በጊዜው ነውና፡፡ በዘመናት ውስጥ ብርሃናውያን የኾኑ ዓመታት እንደ ነበሩ ዅሉ ጽልመታውያን የኾኑ ዓመታትም በአገራችንም ኾነ በሌላው ዓለም እንደ ነበሩ እናውቃለን፡፡ እነዚኽ ተቃራኒ የኾኑ ነገሮች በየፊናቸው ለሰው ልጆች ያተረፉት ስጦታም በስማቸው ልክ እንደ ኾነ ይታወቃል፡፡ ይኹን እንጂ ዘመናትን ብርሃውያን ወይም ጽልመታውያን እንዲኾኑ በማድረግ ረገድ የሰው ልጅ ሚና ትልቅ እንደኾነ የማይካድ ነው፡፡
የሰው ልጅ የማስተዋልና የመቻቻል፣ የመታገሥና የመወያየት፣ የፍቅርና የስምምነት፣ የሰላምና አንድነት ጠቃሚነትን ዘንግቶ በስሜትና በወቅታዊ ትኩሳት፣ እንደዚሁም እግዚአብሔርን የሰላም ድምፅ አልሰማ ብሎ በራስ ወዳድነትና በስግብግብነት ተሸንፎ ወደ ትርምስ ሲገባ ዘመኑ ጽልመታዊ መኾኑ አይቀሬ ነው፡፡ በሰው ችኩልና ደካማ አስተሳሰብ የተጨናነቀ ጽልመታዊ ዘመን ከውድመትና ከጥፋት በቀር አንዳችም ትርፍ እንደሌለው ከአገራችን ተሞክሮ የበለጠ መምህር አይኖርም፡፡
በሌላ በኩል ሰዎች ከእርስ በርስ ግጭት ተላቀው ሰላምንና ፍቅርን፣ አንድትንና እኩልነትን፣ መቻቻልንና መስማማትን፣ መወያየትንና መቀራረብን፣ ወንድማማችነትንና መከባበርን ያረጋገጠ፣ ትዕግሥትና አስተዋይነት የማይለየው የእግዚአብሔርን ድምፅ በመከተልና አእምሮን በማስፋት መኖር ሲጀምሩ ዘመኑ ብርሃናዊ እንደሚኾን፣ ልማቱና ዕድገቱም እንደሚፈጥንና እንደሚረጋገጥ አሁንም በአገራችን ወቅታዊ ተሞክሮ ተረድተዋል፡፡ ይኽ ዅሉ እውነታ የሚያሳየው የዘመን ብርሃንነትና ጽልመትነት የሚወሰነው እኛ ሰዎች በምናውጠነጥነው አስተሳሰብና በምናደርገው እንቅስቃሴ እንደ ኾነ ማስተዋል ተገቢ ነው፡፡ ለዚኽም ነው ሓላፊነቱም ተመልሶ ወደ እኛ የሚመጣው፡፡
ጌታችንም ምርጫውንና ውሳኔውን ለእኛ ትቶ “ብርሃን ስላላችሁ በብርሃን ተመላለሱ” በማለት ገለጻውንና ትምህርቱን ብቻ መናገሩ ከዚህ የተነሣ እንደ ኾነ ማስተዋል ይገባል፡፡ ከእነዚህ ከሁለቱ የሚሻለንን መምረጥና መከተል የእኛ ፈንታ ነው፡፡ ምርጫችን ሰላምና አንድነት ከኾነ ዘመኑ ብርሃን ነው፤ ተቃራኒው ከኾነ ደግሞ የኋልዮሽ ጉዞ ይኾናል፡፡ ስለ ኾነም ምርጫችን ሰላምና አንድነት እንዲኾን ዅላችንም ተስማምተን መወሰን አለብን፡፡
ማንም ሰው ብርሃንና ጨለማ ጎን ለጎን ቀርበውለት የትኛውን ትመርጣለህ የሚል ጥያቄ ቢቀርብለት ያለማመንታት ብርሃኑን እንደሚመርጥ ሳይታለም የተፈታ ነው፡፡ ችግሩ ሰዎች ይህን ግልጽና ጠቃሚ ምርጫ ተቀብለው ተጠቃሚ እንዳይኾኑ ብዙ የሚያታልሉና በድብብቆሽ የሚመላለሱ አካላት በመካከሉ ይገቡና ጨለማውን ብርሃን፣ ብርሃኑንም ጨለማ አስመስለው ሰውን ወደ ገደል መክተታቸው ነው፡፡ በዚህም ምክንያት ብርሃናዊና መልካም የኾነ ምርጫችንን ጥያቄ ውስጥ እንዲገባ ያድርጉታል፡፡ እኛ ሰዎች አእምሯችንን በሚገባ መጠቀም ያለብን እዚኽ ላይ ነው፡፡ ማለትም እኛው ራሳችን የሚጠቅመንና የማይጠቅመንን የመለየት ዓቅም ስላለን ዓቅማችንን ተጠቅመን ለዘላቂ ጥቅማችንና ለትክክለኛ ምርጫችን መወገን ይኖርብናል ማለት ነው፡፡
ሰዎች የኾን ዅላችን ባለ አእምሮዎች ኾነን ተፈጥረናል፡፡ አእምሮ ከእግዚአብሔር ጋር የሚያመሳስለን ስለ ኾነ ከሀብት ዅሉ የበለጠ ሀብት ነው፡፡ ይህንን አእምሯችንን ካዳመጥነውና ከተከተልነው ሐቁን አይስትም፡፡ አመዛዝኖ፣ ገምግሞ፣ ለክቶ ጠቃሚውን ነገር ከልባችን ውስጥ ቁጭ ያደርግልናል፡፡ ነገር ግን ትዕግሥትን፣ ማገናዘብን፣ ቆም ብሎ ማሰላለሰልን፣ ምክንያታዊ መኾንን፣ ማመዛዘንን፣ ፈሪሀ እግዚአብሔርን፣ ፈቃደ እግዚአብሔርን መከተልን ይፈልጋልና እነዚኽን እንደ ግብአት አድርገን ልናቀርብለት ይገባል፡፡ ይህንን መጠቀም ስንችል የዘመናችንና የዕሜያችን ብርሃን ዋስትና ይኖረዋል፡፡ ጨለማም አያሸንፈውም፡፡
የተወደዳችሁ የመንፈስ ቅዱስ ልጆቻችን ኢትዮጵያውያንና ኢትዮጵያውያት
ለዐሥር ዓመታት ያህል የተጓዝንበት የሦስተኛው ሺሕ ወይም ሚሊኒየም ዓቢይ ዘመን ለኢትዮጵያ አገራችን ብርሃናዊ ዘመን የፈነጠቀበት ወቅት ነው፡፡ ምክንያቱም በዚህ ዘመን ዓለም ከተፈጠረ ጀምሮ ያልተነካ ሀብታችን እርሱም የዓባይ ወንዝ ሀብታችንን ለመቋደስ የሚያስችል ግዙፍ የልማት ሥራ ተጀምሮ ወደ መጠናቀቅ እየተቃረበ ያለበት እጅግ ብርሃናዊ ዘመን በመኾኑ ነው፡፡
በሠለጠነው የምዕራቡ ዓለም ካልኾነ በቀር በአፍሪካ ምድር ለዚያውም በድርቅ፣ በረኃብና በጦርነት ትታወቅ በነበረችው ኢትዮጵያ ይኾናሉ ተብለው የማይታሰቡ እጅግ ግዙፍ የኾኑና የሕዝባችንን መሠረታዊ የዕድገት ለውጥ የሚያረጋግጡ የኮንስትራክሽንና የኢንዱስትሪ፣ የትምህርትና የጤና ተቅዋማት በፍጥነት እየገሠገሡ መገኘት በዚህ ብርሃናዊ ዘመን የዕለት ተዕት ትእይንት እንደ ኾኑ በዓይን እየታየ ነው፡፡ ይኽ ጸጋ እንዲሁ ያለ መሥዋዕትነት የተገኘ ሳይኾን እኛ ኢትዮጵያውያን ከዅሉ በላይ ሰላምንና ልማትን መርጠን በአንድነት ወደ ብርሃናዊ አስተሳሰብ ስለ ገባን ነው፡፡ እግዚአብሔርም “በብርሃን ተመላሱ” ያለው ይኽን ለማመልከት ነውና በዚህ ምክንያት ትክክለኛ ምርጫችንን እርሱ ስለባረከልን የልማትና የዕድገት ተምሳሌት መኾን እንደቻልን አንስተውም፡፡
ዛሬም ወደማንወደውና ወደማንመርጠው ጨለማ ሊከቱን የሚሹ እንደ ኤች አይ ቪ ኤድስና ሕገ ወጥ የሰዎች ዝውውር፣ እንደዚሁም በሕዝባችን መካከል መለያየትና መቃቃር ሊያስከትሉ የሚችሉ አፍራሽ ድርጊቶች ብቅ ብቅ በማለት እየተፈታተኑን እንደ ኾኑ መዘንጋት የለበትም፡፡ እነዚኽ ዅሉ በተግባር ያየናቸው የሕዝባችን ቀንደኛ ፀርና የጨለማ አበጋዞች፣ የልማታችንና የሰላማችን ዕንቅፋቶች ናቸውና ሕዝቡ በተለመደው ሃይማኖታዊና አርቆ ማሰብ ኀይሉ እንዲመክታቸው በዚህ አጋጣሚ ጥሪያችንን እናቀርባለን፡፡
በመጨረሻም
የዛሬ ዐሥር ዓመት “ታላቅ ነበርን ታላቅም እንኾናለን” በማለት ለሦስተኛው ሺሕ ወይም ሚሊኒየም ዓቢይ ክፍለ ዘመን የገባነውን ቃል በማደስ በአዲሱ ዓመት ካለፈው ዓመት በበለጠ ጠንክረን በመሥራት፣ ልማታችንንና ዕድገታችንን በፍጥነት በማሳደግ፣ የኤች አይ ቪ ኤድስ በሽታን ባለን የተሞክሮ አሠራር በመመከት፣ እንደዚሁም ሕገ ወጥ ዝውውርን፣ አገርንና ሕዝብን የሚጎዳ ድርጊትን በማክሸፍ፣ በሃይማኖትና በሰላም መርሕ በመመራት አዲሱን ዘመን ብርሃናዊ እንድናደርገው መልእክታችንን በእግዚአብሔር ስም እናስተላልፋለን፡፡
አዲሱን ዘመን የሰላም፣ የፍቅርና የብልጽግና ያድርግልን፡፡
እግዚአብሔር አምላካችን ኢትዮጵያንና ሕዝባችንን ይባርክ፤ ይቀድስ፡፡
ወስብሐት ለእግዚአብሔር፤ አሜን፡፡
አባ ማትያስ ቀዳማዊ
ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት
መስከረም ፩ ቀን ፳፻ወ፲ ዓ.ም
አዲስ አበባ ኢትዮጵያ

 
ርዕሰ ዓውደ ዓመት የአዲስ ዘመን መጀመሪያ

በኢትዮጵያ ያለፈው ዓመት አልቆ የሚተካው የሚጀመርበት መስከረም አንድ ቀን እንደ ቤተክርስቲያናችን ትውፊት ርዕሰ ዓውደ ዓመት የሚል ስያሜ ተሰጥቶታል፡፡ ዘመን ሲያልፍ ዘመን ይተካል፡፡ ትውልድም ሲያልፍ ትውልድ ይተካል፡፡ ለኅልፈትና ለውላጤ የተፈጠረ ፍጡር ሁሉ ወቅትና ጊዜ አለው፡፡ በዚያው በተሰጠው ዘመን ሁሉም ሥራውን ያከናውናል፡፡ አከናውኖም ያልፋል ያለሥራ የተፈጠረ ፍጡር የለምና፡፡
እግዚአብሔር አምላክ ፍጥረታትን ፈጥሮ ሲፈጽም ‹‹ወርእየ እግዚአብሔር ኵሎ ዘገብረ ከመ ጥቀ ሠናይ›› (እግዚአብሔር አምላክ የፈጠረው ፍጥረት ሁሉ መልካም እንደሆነ አየ) ይላል /ዘፍ. 1÷31/ ይህም የሚያስረዳው የተፈጠረው ፍጥረት ሁሉ ያለ አገልግሎት የተፈጠረ አለመሆኑን ነው፡፡ በሰው ዘንድ እግዚአብሔር ከፈጠራቸው ፍጡራንመካከል የሚወደዱና የሚጠሉ ሊኖሩ ይችላሉ፡፡ በአምላክ ዘንድ ግን ሁሉም ፍጥረት የተወደዱ ናቸው፡፡ ይህንንም ሐዋርያው ቅዱስ ጳውሎስ ሲያስረዳ ‹‹እግዚአብሔር የፈጠረው ሥነ-ፍጥረት ሁሉ ያማረና የተወደደ ነው ምንም የሚጣል የለውም›› /1ኛ. ጢሞ. 4÷4/
እግዚአብሔር ፈጥሮ አይጥልም፣ አይረሳም፣ አይዘነጋም ፍጥረቱን ሁሉ በምግብ በጤና ወዘተ ተንከባክቦ ጠብቆ እስከ ተወሰነለት ጊዜ ያኖረዋል፡፡ በይበልጥ ለሰው የሚያደርገው ልግስና የሚሰጠው ጸጋ፣ጥበብ ከሌላው ፍጥረት የላቀ ነው፡፡ በምግብ፣በልብስ እንዳይቸገር ከማድረጉም ሌላ ዘመኑን የሚሰፍርበትና የሚቆጥርበትም አዘጋጅቶ እንዲጠቀም ማስተዋልን ሰጥቶታል፡፡ ስለዚህ ሰከንዱን በደቂቃ ደቂቃውን በሰዓት ሰዓቱን በቀን ቀኑን በሳምንት ሳምንቱን በወር ወሩን በዓመት እያጠቃለለ ምድራዊ ሕይወቱን ከማገባደድ ይደርሳል፡፡ ከዚህም የተነሣ ከላይ እንደተገለጸው አንዱ ዓመት አልፎ ሌላው ሲተካ ርዕሰ ዓውደ ዓመት የዓመት መጀመሪያ ይባላል፡፡
በኢትዮጵያ የዘመን አመዳደብ ዘመናቱ አራቱን ክፍላተ ወንጌል በጻፉት በአራቱ ወንጌላውያን ስም እንዲጠሩ ሊቃውንተ ቤተ ክርስቲያን ወስነዋል፡፡ ወንጌላውያኑም ማቴዎስ ማርቆስ ሉቃስና ዮሐንስ ናቸው፡፡ ከእነርሱም ማቴዎስና ዮሐንስ ከአስራ ሁለቱ ሐዋርያት መካከል ሲሆኑ ማርቆስና ሉቃስ ከሰባ ሁለቱ አርድዕት ናቸው፡፡
በኢትዮጵያችን የዓመቱ መጀመሪያ የሚጠራው ቅዱስ ዮሐንስ እየተባለ ነው ወንጌላውያኑ ግን በየዓመቱ ይፈራረቃሉ ድርሻቸውም ማቴዎስ ማርቆስ ዮሐንስ 365 ቀን ሲሆን የሉቃስ 366 ቀኖች ይሆናሉ፡፡ በዓመቱ መጀመሪያ ቀን በቤተ ክርስቲያን በዕውቀት ከፍተኛ ደረጃ ያላቸው ሊቃውንት የበዓላትና የዓጽዋማትን ቀኖች ለምእመናን የሚያሰሙበት ዕለት በመሆኑ ‹‹ርዕሰ ዓውደ ዓመት ወላዴ መጥቅዕ ወአበቅቴ›› ዮሐንስ የዓመቱ መጀመሪያ የመጥቅዕና የአበቅቴ አስገኝ ነው ተብሎ ተጽፏል፡፡
መጥቅዕ የበዓላትና የአጽዋማት ማውጫ ሲሆን አበቅቴ ደግሞ ከሠርቀ መዓልትና ከሕፀፅ ጋር ተደምሮ የሌሊት ማውጫ ነው፡፡ በዚህ ርዕሰ ዓውደ ዓመት ዕለት ልብ አድርገን ልንመለከተው የሚገባ ዓቢይ ነገር አለ፡፡ ይኸውም ከዓመት እስከ ዓመት የሠራነውን ሥራ ነው፡፡
ዘመን ፍጡራንን ሁሉ የሚያታግል የትግል መስክ ነው፡፡ እርስ በእርሳቸው የሚታገሉ ሰዎች ሁለቱም የድል ባለቤቶች ሊሆኑ አይችሉም፡፡ አንድ ጊዜ የማሸነፍ ሌላ ጊዜ ደግሞ የመሸነፍ ዕድል ሊገጥማቸው ይችላል፡፡ ግን አንድ ጊዜ ተሸነፍኩኝ ብሎ ተስፋ መቁረጥ ተገቢ አይደለም፡፡ ምንጊዜም ቢሆን እግዚአብሔርን ረዳትና አጋዥ አድርጎ ለመልካም ነገር መጣርና መታገል ያስፈልጋል፡፡
በዚህ ዓለም ጠንክሮ ካልታገሉ ሥጋዊ ኑሮን አሸንፎ በሰላምና በደስታ ለመኖር አይቻልም፡፡ ሰው በሕይወተ ሥጋ እስከአለ ድረስ ጠንክሮ የመሥራት ግዴታ አለበት፡፡ ዘመን አልፎ ዘመን ሲተካ እጅን አጣምሮ እግርን ኮርትሞ ቢመለከቱት ለውጥ አይገኝም፡፡
ዘመን የሥራን፣ የንቃትንና የትጋትን የፍቅርንና የሰላምን ተሳትፎ በብርቱ ይጠይቃል፡፡ ዘመን አልፎ ከሄደ በኋላ አይመለስም አስቀድሞ የተዘጋጀ ብቻ አብሮት ለመራመድ ይችላል፡፡
በዘመን የማይለወጥ ነገር የለም ዛሬ ያገኘው ነገ ያጣል ዛሬ ያጣው ነገ ያገኛል፡፡ ዛሬ በጽኑዕ የታመመው በሽተኛ ጥቂት ቀን ሰንብቶ ሊፈወስ ይችላል፡፡ ዛሬ ጤነኛ ነኝ የሚለው ከጊዜ በኋላ ደግሞ በደዌ ዳኛ ባልጋ ቁራኛ ተይዞ ሊጨነቅ ይችላል፡፡ እንዲህ ዓይነቱ ችግር በደረሰ ጊዜ ዘመን አመጣብኝ ብሎ በዘመኑ ማመካኘት አይገባም፡፡ ዘመን የመስጠትና የመንሣት የማዳንና የማሳመም ሥልጣን የለውምና ሁሉም ያለፈጣሪ ሊፈጸም አይችልም፡፡ ዘመናትም ሆኑ ሌሎች ፍጥረታት ያለ እግዚአብሔር ፈቃድ የደስታም ሆነ የችግር ምክንያቶች ለመሆን አይችሉም፡፡ ያለፈው ዓመት በጅቷቸው በዓውደ ዓመቱ የሚደሰቱ ሲኖሩ ዘመኑ ከፍቶባቸው እያዘኑ ያለፈውን ዘመን መልሰህ አታምጣብን የሚመጣውን ዘመን የደስታ አድርግልን በማለት እግዚአብሔር አምላክን የሚማጸኑ አሉ፡፡
አሳቡ መልካም ነው፡፡ ሁሉም ያለ እርሱ ፈቃድ አይሆንምና ለደስታም ሆነ ለኀዘን ለብልጽግናም ሆነ ለድኅነት ምንጩ ዘመን እንደሆነ አድርገው የሚናገሩ አንዳንድ ሰዎች አይታጡም፡፡
ዘመን ግን ታዛዥ እንጂ አዛዥ አይደለም፡፡ ዘመን ለሰው ልጆች የሥራ መሥሪያ እንዲሆን ከእግዚአብሔር የተሰጠ በመሆኑ በሰው ላይ መጥፎ ነገርን እንዲያመጣ የተፈጠረ አይደለምና፡፡
‹‹ያለፈው ዘመን አልሆነኝም ይህ ዘመን ግን ይሆነኛል በይበልጥ ደግሞ ከርሞ የሚመጣው ክፍሌ ነው›› እያሉ ራሳቸውን በራሳቸው የሚደልሉ አንዳንድ ሰዎች መኖራቸው አያጠራጥርም፡፡ ይህ ሁሉ ከንቱ አስተሳሰብ ስለሆነ እግዚአብሔርን ረዳት አድርጎ ሳይጠራጠሩ ጠንክሮ መሥራት ከማንኛውም ችግር ሊያድን ይችላል፡፡
አሮጌው ዘመን አልፎ አዲሱ ሲተካ ባለፈው ዘመን የሠሩትን ሥራ ማስተዋል ያስፈልጋል፡፡ የሰነፈ ቢኖር ባለመሥራቱ ተጸጽቶ ለወደፊቱ ጠንክሮ ለመሥራት ታጥቆ መነሣት አለበት፡፡ ክፉ ሥራ ሠርቶ ከእግዚአብሔር አንድነት የተለየ ቢኖርም ንስሐ ገብቶ ወደ ፈጣሪው ለመቅረብ መዘጋጀት ይኖርበታል፡፡ ይህንንም በሚመለከት ሐዋርያው ቅዱስ ጴጥሮስ ‹‹ኃጢአት የሠራችሁበት ያለፈው ዘመን ይበቃል›› /1ኛ ጴጥ. 4÷3/ በማለት ተናግሯል፡፡ በዚህ መሠረት ዘመን ሲለወጥ እኛም መለወጥ  አለብን፡፡ ርዕሰ ዓውደ ዓመት ተብሎ የተሰየመውን የዓመት መጀመሪያ ስናከብር አዲሱን ዘመን የሰላም፣ የፍቅር፣ የበረከትና የደስታ ዘመን እንዲያደርግልን እግዚአብሔርን በመለመን ነው፡፡
በአዲሱ ዘመን ከእስካሁኑ የተሻለ ሥራ ሠርተን በእመቤታችን በቅድስት ድንግል ማርያም አማላጅነት እንዲሁም በቅዱሳን አማላጅነት መንግሥተ ሰማያትን እንድንወርስ ልዑል እግዚአብሔር ወሰን በሌለው ቸርነቱ ይርዳን፡፡
ወስብሐት ለእግዚአብሔር
(ላዕከ ወንጌል በእደ ማርያም ይትባረክ (ቀሲስ)የአዲስ አበባ ሀገረ ስብከት የትምህርት ሥርጭት ኃላፊ)

 
የመንበረ ጸባዖት ቅዱስ በዓለ ወልድ ሕንጻ ቤተ ክርስቲያን እድሳት ተጠናቆ ቅዳሴ ቤቱ ተከበረ

0265

በኢትዮጵያ ኦርቶዶክስ ተዋሕዶ ቤተ ክርስቲያን፣ በአዲስ አበባ ሀገረ ስብከት፣ በአራዳና ጉለሌ ክፍለ ከተማ ሥር የሚገኘው የመንበረ ጸባዖት ቅዱስ በዓለ ወልድ ሕንጻ ቤተ ክርስቲያን ከዕድሜ ብዛት የተነሣ የሕንጻው መዋቅሮች በመናጋት ደረጃ ላይ የደረሱ በመሆናቸው የካቴድራሉ የሰበካ ጉባኤ ጽ/ቤት ባደረገው ያላሰለሰ ክትትል በአሥራ አንድ ወራት ውስጥ በተደረገ የጥገና እና የዕድሳት ሥራ 2,990,460.32 ብር  ወጪ ጥራቱን በጠበቀ መልኩ ታድሶ ብፁዕ ወቅዱስ አቡነ ማትያስ ቀዳማዊ፣ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት፣ ብፁዓን ሊቃነ ጳጳሳት፣ በርካታ ሊቃውንተ ቤተ ክርስቲያን፣ የሰንበት ት/ቤት ወጣቶችና በርካታ ምዕመናን በተገኙበት ሐምሌ 28 ቀን 2009 ዓ.ም ተባርኮ ሐምሌ 29 ቀን 2009 ዓ.ም በቅዱስነታቸው በተገኙበት ቅዳሴ ቤቱ ተከብሯል፡፡
የመንበረ ጸባዖት ቅዱስ በዓለ ወልድ ቤተ ክርስቲያን በ1883 ዓ.ም በዳግማዊ አፄ ምኒልክ ዘመነ መንግሥት የተመሠረተ ሲሆን ቤተ ክርስቲያኑ የ127 ዓመት ዕድሜ ባለቤት መሆኑን ከቀረባ ሪፖርት ለመረዳት ተችሏል፡፡
ብፁዕ ወቅዱስ ፓትርያርኩ ሕንጻ ቤተ ክርስቲያኑን በባረኩበት ወቅት ባስተላለፉት አባታዊ መልእክት “ቤተ ክርስቲያን ሆይ ኃይልን ልበሺ” በሚል የመጽሐፍ ቃል ንግግራቸውን ጀምረው ይህን የመሰለ ልማት ስላየን ደስ ብሎናል፡፡ ይህ ቤተ ክርስቲያን የረጅም ጊዜ አገልግሎት የሰጠ በመሆኑና ችግሩ የገባችሁ ባለሐብቶችና ምዕመናን ታድሶ በማየታችሁ እንኳን ደስ አላችሁ ብለዋል፡፡
በማያያዝም ቅዱስነታቸው በሰጡት ትምህርታዊ መልእክት ከመንበረ ጸባዖት ቅድስት ሥላሴ ካቴድራል ግቢ እስከ በዓለ ወልድ ቤተ ክርስቲያን ድረስ ያለው መንገድ ስፋትና ጥራት ባለው መልኩ የተሠራ በመሆኑ ደስ ብሎናል፤ ገንዘብ አላፊና ጠፊ ነው፤ ታሪክ ግን ለዘለዓለም ይኖራል በማለት አባታዊ መልእክት አስተላልፈዋል፡፡

በበዓሉ ላይ ተዘጋጅቶ የቀረበውን ሙሉ ሪፖርት ከዚህ ቀጥሎ እንደሚከተለው እናቀርባለን
የመካነ ሥላሴ (ቅዱስ በዓለ ወልድ) ቤተ ክርስቲያን የዕድሳት ሥራን አስመልክቶ ከካቴድራሉ ሰበካ ጉባዔ አስተዳደር ጽ/ቤት የቀረበ አጭር የሥራ ክንውን ሪፖርት፡፡
ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአኵሱም ወዕጨጌ ዘመንበረ ተክለ ሃይማኖት፣ ብፁዓን ሊቃነ ጳጳሳት፣ ክብርት ዶ/ር ኂሩት ወ/ማርያም  የባህልና ቱሪዝም ሚኒስቴር ሚንስትር ፣ ክቡር መ/ር ጎይቶም ያይኑ የአዲስ አበባ ሀገረ ስብከት ዋና ሥራ አስኪያጅ ፣ ክቡር አቶ ዮናስ ደስታ የቅርስ ጥበቃና ምዘና ባለሥልጣን ዳይሬክተር ፣ ክቡር አቶ ገ/ጻድቅ ሐጎስ የአዲስ አበባ ከተማ አስተዳደር ባህልና ቱሪዝም ዋና ሥራ አስኪያጅ፣ የተከበራችሁ የጠቅላይ ቤተ ክህነት የመምሪያ ኃላፊዎች፣ የተከበራችሁ የአዲስ አበባ አድባራትና ገዳማት አስተዳዳሪዎች ክቡራንና ክቡራት በዚህ ምርቃት በዓል ላይ የተገኛችሁ ምዕመናንና ምዕመናት!!!
በቅድሚያ የመካነ ሥላሴ (ቅዱስ በዓለወልድ) ቤተ ክርስቲያን ዕድሳት ሥራ ተጠናቆ ለዚህ ታላቅ ክብረ በዓል ላይ እንድንገኝ ላደረገ ለጌታችን መድኃኒታችን ኢየሱስ ክርስቶስ ምስጋና ይድረሰው እያልኩ የዕድሳት ሥራውን በተመለከተ በካቴድራሉ ሰበካ ጉባዔ ጽ/ቤት ስም አጠር ያለ ሪፖርት እንዳቀርብ እንዲፈቀድልኝ በትህትና እጠይቃለሁ፡፡  
ብፁዕ ወቅዱስ አባታችን፣ ብፁዓን ሊቃነ ጳጳሳት፣ በዚህ ታላቅ ክብረ በዓል የተገኛችሁ ክቡራን እንግዶች ምዕመናንና ምዕመናት!!
ወደ ዋናው የሥራ ሂደት ዝርዝር ጉዳይ ከመግባታችን በፊት ከቤተ ክርስቲያኑ ቀደምት ታሪክ በመነሣት ታሪካዊ ምሥረታውን አስመልክቶ አጠር ባለ ሁኔታ አስታውሰን ለማለፍ እንሞክራለን፡፡
የቅዱስ በዓለወልድ /መካነ ሥላሴ/ ቤተ ክርስቲያን የተመሠረተው በ1883 ዓ.ም በዳግማዊ አፄ ምኒልክ አማካይነት ሲሆን ለምሥረታው የተነሳሱበትም ዋናው ምክንያት አንድ ባሕታዊ መነኩሴ "ከቤተ መንግሥትዎ በስተቀኝ ባለው ከፍታ ቦታ ላይ ሦስት ነጫጭ ርግቦች መጥተው ሲያርፉ በራዕይ አይቻለሁና (መካነ ሥላሴ) የሚል ጽሕፈት ያለበት ጽላት አስፈልገው በማምጣት እንዲተክሉ እግዚአብሔር አዟልና እንዲተከል ይሁን፡፡" ስለተባሉ በዚሁ መነሻነት መካነ ሥላሴ የሚል ጽሕፈት ያለበት ጽላት ሲያስፈልጉ ቆይተው ከአዲስ ዓለም በላይ ፉየታ ከሚባለው ቦታ እንዳለ በጥቆማ ስለደረሱበት ለቦታው ሌላ ጽላት ተፈልጎለት በንጉሡ ትእዛዝ በአለቃ ወልደ ያሬድ ኤላሪዮን አስመጭነት በወቅቱ የኢትዮጵያ ሊቀ ጳጳሳት በነበሩት በግብፃዊው ሊቀ ጳጳስ አቡነ ማቴዎስ እጅ ከተረከቡ በኋላ ዳግማዊ አፄ ምኒሊክ ንጉሠ ሸዋ በተባሉ በ25ኛው ዓመት የኢትዮጵያ ንጉሠ ነገሥት ሆነው በነገሡ በአንደኛው ዓመት ታህሣሥ 22 ቀን 1883 ዓ/ም የአዛዥ ዘአማኑኤል እልፍኝ ተባርኮ በዚሁ ቅዱስ ሥፍራ በመቃኞ /በመቃረቢያ/ ቆይቶ ይህ አሁን ለዕድሳት የበቃው ሕንፃ ቤተ ክርስቲያን ለ12 ዓመታት በግንባታ ላይ ከቆየ በኋላ በ1895 ዓ/ም በመጠናቀቁ መስከረም 7 ቀን 1895 ዓ/ም ታቦተ ሕጉ ከነበረበት መቃረቢያ ወጥቶ በዓለ ንግሥ ተደርጎለት አዲስ ወደ ታነፀው ሕንፃ ቤተ ክርስቲያን ገብቶ ቅዳሴ ቤቱ በዛሬው ዕለት ተከብሯል፡፡
በዚሁ አጋጣሚ ሳይጠቀስ የማይታለፈው ዐቢይ ጉዳይ ደግሞ ቀደም ሲል ጽላቱ ከግራኝ መሐመድ ወረራ በፊት ወረኢሉ ደሴ የነበረ ሲሆን በግራኝ ወረራ ምክንያት ካህናቱ አሽሽተው  ወግዳ ወስደው አኑረው ለብዙ ዘመናት ከቆየ በኋላ የራስ ጎበና ባለቤት ወ/ሮ አየለች ከወሎ ወግዳ አስመጥተው አዲስ ዓለም በላይ ፉየታ ከተባለው ቦታ ላይ አስተክለው እንደነበርና ታሪኩ እንደሚያስረዳው በአፄ ምኒልክ ትዕዛዝ ወደ አዲስ አበባ መጥቶ በዚሁ ቦታ ላይ የተተከለ ሲሆን መካነ ሥላሴ የሚለው የደብሩ ስያሜም የተሰጠው ከጽላቱ ላይ ከተገኘው ጽሕፈት በመነሳት እንደሆነ ከታሪኩ ለመረዳት ተችሏል፡፡
ይህ በእንዲህ እንዳለ ከታሪክም ሆነ ከተለያዩ የመረጃ ምንጮች መረዳት እንደተቻለው ቀደምት የኢትዮጵያ ነገሥታት ከክርስትና ሕይወታቸው በመነሳት ቀዳሚ ተግባራቸው ሕንፃ ቤተ ክርስቲያን መሥራትና ማሠራት እንደነበረ የታሪክ ድርሳናት ጎላ አድርገው ያሳያሉ ለአብነት ያህል ለመጥቀስም አብርሃ ወአጽብሃ የተባሉት ወንድማማቾች ነገሥታት ቤተ ክርስቲያን
ከማሳነጽም አልፈው ወንጌልን በኢትዮጵያ ዞረው እየሰበኩ ክርስትናን ያስፋፉ እንደነበረ ከታሪክ የምንረዳው ሕያው ምስክር ነው፡፡
ከዚያም እነ ንጉሥ ላሊበላ ፣ ይምርሃነ ክርስቶስ ፣ ነአኩቶ ለአብና ሌሎቹም ነገሥታት በግንባር ቀደምትነት የሚጠቀሱ ሲሆኑ አፄ ምኒልክና አፄ ኃይለ ሥላሴ ከከዋክብቱ ነገሥታት መካከል ጎልተው የሚታዩ ናቸው እነዚህ ነገሥታት ራሳቸው ሕንፃ ቤተ ክርስቲያን መሥራት ብቻ ሳይሆን መኳንንቱና መሣፍንቱ ሕዝበ ክርስቲያኑም ጭምር ቤተ ክርስቲያን እንዲሠሩ ያረጀውን እንዲያድሱ፣ የተጎዳውን እንዲጠግኑና አቅማቸው በፈቀደው መጠን ለቤተ ክርስቲያን አስተዋጽዖ እንዲያደርጉ አዋጅ እስከ ማስነገር ደርሰው እንደነበር ሲወሳ እንደነበር በታሪክ ይነገርላቸዋል፡፡ አፄ ምኒልክ በዚሁ ጉዳይ ለአብነት ያህል ተጠቃሽ ናቸው ከዚህም ሌላ ርስተ ጉልት በመስጠትና በመትከል የመተዳደሪያ ሥሪት ሠርተውላት ቤተ ክርስቲያን ያለምንም ችግር ትተዳደር እንደነበር የቅርብ ጊዜ ትውስታ ነው፡፡ በአሁኑ ወቅት ግን ቤተ ክርስቲያን በአማኞቿ አስተዋጽዖ ብቻ እንድትተዳደር የተደረገ ሲሆን ከቅርብ ጊዜ ወዲህ ግን ቤተ ክርስቲያኗ በልማት ራሷን እንድትችል በማሰብ በቅዱስ ሲኖዶስና ቅዱሳን ፓትርያርኮች አመራር ሰጪነት አንዲሁም በመንግሥት ድጋፍ ሰጪነት በልማት ሥራ እየተንቀሳቀሰች የምትገኝ መሆኑ ግልጽ ነው፡፡ በአጠቃላይ ከላይ እንደተጠቀሰው ቀደም ሲል የነበሩት ነገሥታት የሀገር መሪዎች ብቻ ሳይሆኑ የቤተ ክርስቲያንም መሪዎች እና ጠባቂዎች ጭምር እንደነበሩ የሚታወቅ ሐቅ ነው፡፡
ወደ ቦታው ታሪክ እና ወደ ስያሜውም ስንመለስ ነገሥታቱ ቤተ ክርስቲያን ሲያንፁ ወይም ሲተክሉ በቅድሚያ የሚተክሉት ወይም የሚያንፁት በሥላሴ ስም እንደነበር የታሪክ ምንጮች ይገልጻሉ፡፡
ስለሆነም አፄ ምኒልክ መካነ ሥላሴን የተከሉት ከዚህ በመነሳት ነው፡፡ ዳግማዊ አፄ ምኒልክ ቤተ መንግሥታቸውን ከእንጦጦ ወደ መሐል አዲስ አበባ አራት ኪሎ ካዛወሩ በኋለ አያታቸው ንጉሥ ሣህለ ሥላሴ ያሠሩትን ቀራንዮ መድኃኔ ዓለምን ጨምሮ አምስት አብያተ ክርስቲያናትን እንደሠሩ የሚታወቅ ሲሆን ይህ በአሁኑ ሰዓት 127ኛ ዓመቱን እያከበረ ያለው የዕድሜ ባለጸጋና በአዲስ አበባ ከተማ የሚገኘው ታሪካዊ ቅርስ የሆነው መካነ ሥላሴ (አሁን ቅዱስ በዓለወልድ) ቤተ ክርስቲያን በአሠራረሩ ቅደም ተከተል በ6ኛ ደረጃ ላይ የሚገኝ ነው፡፡
 መካነ ሥላሴ የሚለው ስያሜ ወደ በዓለ ወልድ የተለወጠበት ምክንያትም ግርማዊ ቀዳማዊ አፄ ኃይለ ሥላሴ ይህን ዓለም አቀፋዊ ይዘት ያለውን ካቴድራል ከሠሩ በኋላ መንበረ ጸባዖት ቅ/ሥላሴ ካቴድራል የሚለውን ሥያሜ በማግኘቱና በአንድ ቦታና አስተዳደር ሥር አንድ ዓይነት ስያሜ ሊኖር እንደማይገባ ስለታመነበት የተሰየመለት ይመስላል፡፡
ብፁዕ ወቅዱስ አባታችን ሆይ
ይህ የትላንቱ ሲሆን ዛሬም ይኸው ጥንታዊ ቤተ ክርስቲያን ከዘመን ብዛትና ከረጅም ጊዜ አገልግሎት የተነሳ የጣሪያው ክዳን ቆርቆሮ በማፍሰሱ ጽላቱንና ቅዱሳት መጻሕፍቱን እንዲሁም በመቅደሱ ውጫዊ የግድግዳ ዙሪያ የሚገኙትን ቅዱሳት ሥዕላትና ሌሎችንም ንዋየ ቅዱሳት ከማበላሸቱም አልፎ ሕንፃ ቤተ ክርስቲያኑን ሊያፈርሰው የሚችል መሆኑን የካቴድራሉ ሰበካ ጉባዔ አስተዳደር ጽ/ቤት ስለተገነዘበ እግዚአብሔር በነብዩ ሐጌ አድሮ እንደተናገረው "በውኑ ይህ ቤት ፈርሦ ሳለ እናንተ ራሳችሁ በተሸለሙ ቤቶቻችሁ ለመኖር ጊዜው ነውን?"ሐጌ ፩÷፬ ያለውን አምላካዊ ቃል መሠረት በማድረግ ከቅዱስነትዎ አባታዊ መመሪያ በመቀበል፣ የአዲስ አበባ አስተዳደር ባህልና ቱሪዝም ጽ/ቤቱን በማስፈቀድ የካቴድራሉ ሰበካ ጉባዔ ከካቴድራሉ ዕድሳትና ልማት ኮሚቴ ጋር በመተባበር የሰንበቴ ማኅበራትንና በጎ አድራጊ ክርስቲያኖችን በማስተባበርና እርዳታ በመጠየቅ እንዲሁም ከአዲስ አበባ ሀገረ ስብከት እና ከቅርስ ጥበቃና ምዘና ባለሥልጣን ባገኘው ፈቃድ መሠረት ቅርሱ ይዘቱን ሳይለቅ ተገቢውን ሁለንተናዊ ጥገናና ዕድሳት ተደርጎለት የተጠናቀቀ በመሆኑ እነሆ ቅዳሴ ቤቱን በዚሁ ዕለት በከፍተኛ ድምቀትና ስነ-ሥርዓት በማክበር ላይ እንገኛለን፡፡
በማያያዝም ዝርዝር የዕድሳት ሂደቱን ለመግለጽ ጠቅለል አድርገን ከዚህ በሚከተለው ሁኔታ እናቀርባለን፡፡
ሀ.የጣሪያውን ዕድሳት በተመለከተ፣
በተመሳሳይና ደረጃውን በጠበቀ ሁኔታ የመሐል ወራጆቹ ሙሉ በሙሉ ከነክፈፉ በአዲስ ሲቀየር ማገሩም በአዲስ ሞራሌ ተተክቷል፣ የቆርቆሮ ክዳኑም በባለ 28 ጌጅ ቆርቆሮ ተቀይሯል የቆርቆሮው ብዛትም በቁጥር 552 ሲሆን ሥራውም እጅግ በታወቁና በቤተ ክርስቲያን ሥራ ላይ የብዙ ዓመታት ልምድ ባላቸው አቶ ደምሰው ደገፉ በተባሉ ጠንቃቃ ባለሞያ ተሠርቶ ለዚህ ምርቃት በቅቷል የጣሪያው ጉልላትም ባማረና በተዋበ ሁኔታ እንዲሠራ የተደረገ ሲሆን በጉልላቱና በክፈፉ ዙሪያ የሚገኘው መርገፍም በልዩ ግርማ ሞገስ በአዲስ መልክ ተሠርቶ ተጠናቋል፣ በውጫዊው የጣሪያ ክፍል ማለትም በደረጃው ዙሪያ የሚገኘው የጣሪያ ክፍል ዙሪያው የመስቀል ቅርፅ ባለው ጣውላ ኮርኒስ ተሠርቷል፣ በተዛነቡ ዙሪያ የሚገኘው ክፍልም ቅርስነቱን ሳይለቅ በስስ ጌጠኛ አልሙኒየም መሰል ላሜራ ልምድ ባለው ባለሙያ እንዲሠራ ተደርጓል፡፡
ለ.ወለሉን በተመለከተ፡፡
ሦስቱም የቤተ ክርስቲያን ክፍሎች ማለትም ቤተ መቅደሱ፣ ቅድስቱና ቅኔ ማኅሌቱ በውስጡ ያለው አፈር ተቆፍሮ ወጥቶ በኮንክሪት ሊሾ የተደረገ ሲሆን እንዲሁም  ቅድስቱና ቅኔ ማኅሌቱ በፐርኬ ጣውላ እጅግ በተዋበ መልኩ ተነጥፏል በተጨማሪም ከፐርኬው በላይ ደረጃውን የጠበቀ ምንጣፍ አንዲለብስ በበጎ አድራጊ ተገዝቶ ተዘጋጅቶለታል፡፡
ሐ.የቀለም ሥራን በተመለከተ፡፡
 በሕንፃ ቤተ ክርስቲያኑ ዙሪያ በውስጥም ሆነ በውጭ የተሣሉት ሥዕሎችና ሐረጎች  ቅርፃቸውም ሆነ ሐረጋቸው ባለበት ሁኔታ በጥንቃቄ አስፈላጊው እድሳት የተደረገላቸው ሲሆን እንዲሁም የውጭና የውስጥ ሙሉው የግድግዳ ቀለም የመቀባት ሥራ ተከናውኗል፡፡
መ.የቤተ ክርስቲያኑ ውስጣዊና ውጫዊ ክፍል /ተዛነቡን/ የመብራት ሥራን በሚመለከት
የቤተ ክርስቲያኑ ውስጣዊ ክፍል መብራት ቢኖረውም ደረጃውን ያልጠበቀ በመሆኑ ይህም በጣም በተዋበና ባማረ መልኩ ዙሪያውን በአዲስ መስመር በተንጠልጣይ አምፖሎች ተቀይሯል፡፡ ውጫዊ ክፍሉም  (ተዛነቡ) ቀደም ሲል መብራት ያልነበረው ሲሆን በጣሪያው ማለትም አዲስ ኮርኒስ በተሠራው ዙሪያ አዲስ የኤሌክትሪክ የመስመር ዝርጋታ /ኢንስታሌሸን/ ፣ ማቀፊያዎችና አምፖሎቹም ጭምር በአዲስ ተተክቷል፡፡
ሠ.መንበረ ምሥዋዑን (አዲስ የተሠራው መንበርን) በተመለከተ፡፡
 በአዲስና በተሻሻለ ይዘት ምሥጢራዊ ትርጉሙን በጠበቀ መልኩ ማለትም ፀወርተ መንበር ኪሩቤል /ዐርባዕቱ እንስሳ/ ፣ 24ቱ ካሕናተ ሰማይ ሱራፌል ምስልና፣ ጌታ በምሴተ ሐሙስ ከደቀ መዛሙርቱ ጋር የመጨረሻውን ራት ያደረገበትንና ሥርዓተ ቁርባንን የመሠረተበትን እንዲሁም ሌሎች ምሥጢራቸውን የጠበቁ ቅርፃዊ ሥዕሎች የተሣሉበት እጅግ የተዋበ ልዩ መንበር ከእንጨት ተቀርፆ ለአገልግሎት እንዲውል ተደርጓል፡፡
ረ. በበዓለ ወልድ ዙሪያ የሚገኙ  መካነ መቃብራትንና በቅፅረ ግቢው ዙሪያ የተሠሩ መጠለያዎችን በተመለከተ፡፡  
ቀደም ሲል በበዓለ ወልድ ቅፅረ ግቢ የሚገኙት የመካነ መቃብር ቦታዎች የቤተ ክርስቲያኑን ቅፅረ ግቢ በማጣበባቸው ምክንያት ለአገልግሎት የሚመጣው ምዕመን የማስቀደሻም ሆነ የጸሎት ቦታ ባለማግኘቱ ሐውልቶቹን ማንሳት አስፈላጊ ሆኖ በመገኘቱ ይህንኑ ጉዳይ በማስመልከት ለቀብሩ ባለቤቶች በተለያዩ የመገናኛ ብዙኃን በማስነገርና በተያያዥም ለማየት አመቺ በሆኑ ቦታዎች ላይ ዝርዝራቸውን የያዘ ማስታወቂያ የተለጠፈ በመሆኑ ቤተሰቦች ከመገናኛ ብዙኃን በመስማት እና የተለጠፈውን ማስታወቂያ በማየት ወደ ካቴድራሉ ሰበካ ጉባዔ ጽ/ቤት በመምጣታቸው የካቴድራሉ ሰበካ ጉባዔ ጽ/ቤት የውይይት መድረክ በመፍጠር 99% (ዘጠና ዘጠኝ ከመቶ) ከሚሆኑ ቤተሰቦች ጋር በተደረሰው ስምምነት መሠረት በቤተ ክርስቲያኑ ዙሪያ ያሉት መካነ መቃብራት አጽማቸው ሳይነሳ
ባለበት ሆኖ በተለያየ ቅርፅ የተሠሩት ሐውልቶችና ዙሪያቸውን የታጠረው አጥር ብቻ እንዲነሳ ተደርጎ ዛሬ ዙሪያውን አምሮና ተውቦ የሚታየው መጠለያ "በአንድ ወንጭፍ ሁለት ወፍ" እንዲሉ ሕያዋኑ ለሙታኑ እንዲጸልዩ ሆኖ መጠለያው ለሁለት አገልግሎት እንዲውል ሆኖ ተሠርቷል፡፡
ሰ. ካቴድራሉንና የቅዱስ በዓለወልድ ቤተ ክርስቲያንን በአስፋልት ለማገናኘትና ውበቱን የጠበቀ ግቢ ለመፍጠር እየተደረገ ያለውን ተግባር በሚመለከት፡፡
ቀደም ሲል የካቴድራሉና የመካነ ሥላሴ (ቅዱስ በዓለ ወልድ ቤተ ክርስቲያን) ቅፅረ ግቢ ቦታው በመካነ መቃብር ተይዞ ካቴድራሉና ቅዱስ በዓለወልድ ቤተ ክርስቲያን ግቢው ተለያይቶ የነበረ ሲሆን በተለይም የመካነ መቃብር ሥፍራው እጅግ ከመጣበቡም በላይ ጽዳቱ ያልተጠበቀና የቆሻሻ ማጠራቀሚያ ቦታ በመሆኑ ቤተ ክርስቲያኑ እንደ ታሪካዊነቱና ቅርስነቱ አንፃር ሲታይ እንኳንስ በቱሪስት ሊጎበኝ ቀርቶ ምዕመናኑ በወርኃዊና ዓመታዊ ክብረ በዓል ወደዚህ ቦታ ለመምጣት እጅግ በጣም እየተቸገሩ እንደሚገኙ ለሁላችንም ግልጽ ቢሆንም ሕዝበ ክርስቲያኑን ለመቀስቀስና ለማንቃት እነዲሁም የግቢውን ውበትና ጽዳት ለማስጠበቅ ያህል በመቃብር የተጨናነቁ ሥፍራዎችን በማንሳት የካቴድራሉንና የቅዱስ በዓለ ወልድ ቤተ ክርስቲያንን ለማገናኘት ጥረት ተደርጓል፡፡
ቅጽረ ግቢውን ለማስዋብና ለማጽዳት እንዲሁም ለማገናኘት በተደረገው ጥረት ቅዱስ በዓለ ወልድ  የመረጣቸው ባለሀብት ለአምስት ተከታታይ ቀናት ግሬደር በማስመጣት የቁፋሮና የማስተካከል ሥራ ያሠሩልን ሲሆን በተለይም  እንይ ኮንስትራክሽን የተባለው ድርጅት ሙሉውን የአስፋልት ሥራ ለማከናወን በገባልን ቃል መሠረት ከፍተኛ መዋዕለ ንዋይ በመመደብ ከቁፋሮና አፈር ከማንሳት ሥራ ጀምሮ አሁን አምሮ የሚታየውን የሰብ ቤዝ ሥራ አከናውነው ለቀጣይ አስፋልት ሥራ ምቹ አድርገውት ይገኛሉ፡፡
ሸ. ከላይ ለበዓለ ወልድ ቤተ ክርስቲያን ሕንፃ ቤተ ክርስቲያን ዕድሳት፣ የመጠለያ ሥራ ከካቴድራሉ ሰበካ ጉባዔ ጽ/ቤት ወጪ የተደረገና ከበጎ አድራጊ ምዕመናንን የተሰጠ ገንዘብ ከዚህ በመቀጠል አቀርባለሁ፡፡
1.ከተለያዩ ግለሰቦች በሞዴል 30 ገቢ የሆነ ብር-----300,175.00
2.ከአቶ ኃ/ሚካኤል ወ/ገብርኤል ብር--------------305,000.00  የፐርኬ ሥራ
3.ከታላቁ ሰንበቴ ማኅበር ብር --------------- ----447,300.00  የጣሪያ መዋቅር ሥራ
4.ከአቶ ድረስ አስፋው ብር ----------------------26,350.00 የመንበርና ኮርኒስ ሥራ
5.ከአቶ አያሌው ወ/ትንሳኤ ----------------------70,000.00 የቆርቆሮ ግዥ
6.ከአቶ ሰሎሞን እንግዳ -------------------------106,000.00 ምንጣፍ ግዥ
7.ከወ/ሮ በላይነሽ አድማሱ ----------------------130,000.00 ቆርቆሮ፣ሲሚንቶና አሸዋ
8.ከወ/ሮ ፋንታዬ አድማሱ ----------------------75,000.00
9.ከአቶ ብርሃኑ ኃ/ማርያም ----------------- ----28,000.00
10.ከወ/ሮ ወይንሸት በጅጋ ----------------- ----43,335.00
11.ከእህተ ገብረኤል ----------------------------38,000.00
12.ከወ/ሮ ደብረወርቅ ብር ----------------- ----62,000.00 ለመጠለያ ሥራ
13.ከአቶ ጳውሎስ ባራኪ ብር --------------------33,000.00 ለመጠለያ ሥራ
14.ከምሥራቀ ጸሐይ ሰንበቴ ማኅበር ------------15,200.00 ቆርቆሮ ግዥ
15.ከተለያዩ ግለሰቦች --------------------------362,694.00
16.ከካቴድራሉ ሰበካ ጉባዔ ጽ/ቤት --------------748,394.32
  ጠቅላላ ድምር ------------2,990,460.32 መሆኑን እየገለጽኩ ቅዱስነትዎ ለዚህ ሥራ አስተዋጽዖ ያደረጉልንን በጎ አድራጊዎች እንዲባርኩልን በቅዱስ በዓለ ወልድ ስም እጠይቃለሁ፡፡
ብፁዕ ወቅዱስ አባታችን፣ ክቡራን እንግዶች፣ ምዕመናንና ምዕመናት !!
 ይህ በኢትዮጵያ ኦርቶዶስ ተዋሕዶ ቤተ ክርስቲያን ቀደምትነት ያለውና ዓለም አቀፋዊ ይዘት ያለው ካቴድራል እንደመሆኑ መጠን ማንኛውም ታላላቅ ሃይማኖታዊ፣ ዓለም አቀፋዊ ስነ-ሥርዓቶች
የሚናወኑበት ከመሆኑም በላይ ሁለት ታላላቅ ቅዱሳን የሃይማኖት አባቶችና፣ ሁለት ታዋቂ የሀገር መሪዎች፣ ብፁዓን ሊቃነ ጳጳሳት፣ የንጉሣውያን ቤተሰቦች፣ ሚንስትሮች አርበኞች፣ የሌሎችም ታዋቂና የሀገር ባለውለታዎች አፅም ያረፈበትና የሚገኝበት ታላቅ ቦታ ስለሆነ መንግሥትን ጨምሮ ከቅዱስ ሲኖዶስ አንስቶ እስከ ሕዝበ ክርስቲያኑ ድረስ ያሉ አካላት ለካቴድራሉ ችግር ትልቅ ትኩረት ሊሰጡበት ይገባል ስንል እግረመንገዱን መልእክታችንን ለማስተላለፍ እንፈልጋለን፡፡
ትኩረት ሊሰጥባቸው ከሚገባቸው ችግሮች መካከልም
1ኛ. በአፄ ኃይለ ሥላሴ ዘመነ መንግሥት የነበረው ይዞታ በካርታ ላይ እንደሚያሳየው 142,000.00 (አንድ መቶ አርባ ሁለት ሺህ ካሬ ሜትር) በደርግ ዘመነ መንግሥት የተወረሰውን ጨምሮ በቀጥታም ሆነ በተዘዋዋሪ የካቴድራሉ ይዞታ በግለሰቦችና በድርጅቶች ተይዞ ስለሚገኝ የኢፌዲሪ መንግሥት በ1987 ዓ.ም ባወጣው መመሪያ በካርታ ቁጥር 5634 ተመዝግቦ የሚገኘው ከላይ የተጠቀሰው የካቴድራሉ ነባር ይዞታ እንዲከበርላቸው ተብሎ ከጠቅላይ ሚኒስቴር ጽ/ቤት የሰርኩላር ደብዳቤ የተላለፈልን ቢሆንም እስከ አሁን ድረስ ነባር ይዞታችን እንዲከበርልን ለጠቅላይ ሚኔስቴር ጽ/ቤትና ጉዳዩ ለሚመለከታቸው የመንግሥት መሥሪያ ቤቶች አቤቱታ በማቅረብ ላይ የምንገኝ ቢሆንም እስከአሁን ድረስ ጥያቄያችን መልስ ሳያገኝ በእንጥልጥል ላይ የሚገኝ መሆኑ፣
2ኛ. ከ50 ዓመታት በላይ እድሜ ያስቆጠረውና ታላላቅ የቤተ ክርስቲያን አባቶችንና በተለይም ቅዱስነትዎንና ሌሎች ምሁራንን በማፍራት የሚታወቀው የካቴድራሉ 1ኛ ደረጃ ት/ቤት  በአዲስ መልክ ዘመናዊ የመማሪያ ሕንፃ  ለመገንባት ያስችለን ዘንድ በግቢው ውስጥ የሚኖሩ ነዋሪዎች ተለዋጭ ቦታ እንዲሰጣቸው በከተማው አስተዳደር መመሪያ ቢተላለፍም እስከ አሁን ድረስ አፈጻጸሙ መዘግየቱ ለካቴድራሉ ሰበካ ጉባዔ ጽ/ቤት ዋና ዋና ተግዳሮቶች ናቸው፡፡
ብፁዕ ወቅዱስ አባታችን፣ ብፁዓን ሊቃነ ጳጳሳት ክቡራንና ክቡራት!!
በአጠቃላይ በእግዚአብሔር መልካም ፈቃድ የመካነ ሥላሴ (ቅዱስ በዓለወልድ) ቤተ ክርስቲያን እና ካቴድራሉ በመጠኑም ቢሆን ግቢው መገናኘቱ ለካቴድራሉ ሰበካ ጉባዔ ጽ/ቤቱም ሆነ ለመላው ሕዝበ ክርስቲያኑ የሚያስደስት ጅምር የልማት ተግባር መሆኑን ለመግለጽ ያህል እንጂ በቀጣይም የካቴድራሉ ሕንፃ ቤተ ክርስቲያንም እድሳት፣ በካቴድራሉ ቅፅረ ግቢ ያለውን የምዕመናን መገልገያ ሥፍራ ደረጃውን የጠበቀና ሳቢ በሆነ የላንድ እስኬፕ ለማስዋብና ለማስጌጥ በተጨማሪም በበዓለ ወልድ ቤተ ክርስቲያንን ዙሪያ የሚገኘውን የመካነ መቃብር ሥፍራ መልሶ ለማልማትና ውበቱን የጠበቀ የመካነ መቃብር ሥፍራ ለማዘጋጀት የካድራሉ ሰበካ ጉባዔ ጽ/ቤት ዕቅድ አዘጋጅቶ ወደ ሥራ ለመግባት ቅድመ ሁኔታውን እያጠናቀቀ ስለሆነ በዚህ በቅዱስ በዓለ ወልድ ቤተ ክርስቲያን እድሳት ላይ እንደተረባረባችሁ ሁሉ በቀጣይም በካቴድራሉ እድሳት እና በሌሎቹም ተያያዥ ሥራዎች ላይ በማቴሪያልም ሆነ በገንዘብ እርዳታ እንድታደርጉልን መልካም ትብብራችሁ እንዳይለየን በአጋዕዝተ ዓለም ሥላሴ ስም እየጠየኩ ሪፖርቴን በዚህ ላይ አጠናቅቄአለሁ፡፡
የቅዱስነትዎ ቡራኬ ይድረሰኝ፡፡    

 
<< ጀምር < ወደኋላ 1 2 3 4 5 6 7 8 9 10 ወደፊት > መጨረሻ >>

ገጽ 5 ከ 107

አድራሻ

አዲስ አበባ ፤ ኢትዮጵያ

ኢ-ሜይል: aadioces@gmail.com

ድረ ገጹ ውስጥ ይፈልጉ

ሀሳበ ባሕር(የዘመን ቁጥር)

ባሕረ ሐሳብ የዘመን መቁጠሪያ

ግጻዌ