መንበረ ፓትርያርክ ቅድስተ ቅዱሳን ማርያም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ገነተ ጽጌ ቅ/ጊዮርጊስ

የምዕራብና የደቡብ አዲስ አበባ አህጉረ ስብከት ሊቀ ጳጳስ

ቦሌ ደብረ ሳሌም መድኃኔዓለም

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ ጸባዖት ቅድስት ስላሴ ካቴድራል

የምዕራብና የደቡብ አዲስ አበባ አህጉረ ስብከት ሊቀ ጳጳስ

ርዕሰ አድባራት መንበረ ፀሐይ እንጦጦ ማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ምስካየ ኅዙናን መድኃኔኃለም ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ታዕካ ነገሥት በዓታ ለማርያም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ጽጌ ቅድስ ኡራኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

መንበረ መንግሥት ቅ/ገብርኤል ገዳም

የምዕራብና የደቡብ አዲስ አበባ አህጉረ ስብከት ሊቀ ጳጳስ

ደብረ ኃይል ራጉኤል

የምዕራብና የደቡብ አዲስ አበባ አህጉረ ስብከት ሊቀ ጳጳስ

http://www.addisababa.eotc-churches.org/site/components/com_gk2_photoslide/images/thumbm/590538kidste_mariam.jpg http://www.addisababa.eotc-churches.org/site/components/com_gk2_photoslide/images/thumbm/895720giorgis.jpg http://www.addisababa.eotc-churches.org/site/components/com_gk2_photoslide/images/thumbm/903816bole_medhaniealem.jpg http://www.addisababa.eotc-churches.org/site/components/com_gk2_photoslide/images/thumbm/683566trinity.jpg http://www.addisababa.eotc-churches.org/site/components/com_gk2_photoslide/images/thumbm/821897entoto_mariam.jpg http://www.addisababa.eotc-churches.org/site/components/com_gk2_photoslide/images/thumbm/310283meskaye_1.jpg http://www.addisababa.eotc-churches.org/site/components/com_gk2_photoslide/images/thumbm/904160BEATA_MARIAM.jpg http://www.addisababa.eotc-churches.org/site/components/com_gk2_photoslide/images/thumbm/578084urael.jpg http://www.addisababa.eotc-churches.org/site/components/com_gk2_photoslide/images/thumbm/812647gebrie_gedam.jpg http://www.addisababa.eotc-churches.org/site/components/com_gk2_photoslide/images/thumbm/681179raguel.jpg
ቁጥራቸው ከ3,000 በላይ የሚገመት በደቡብ ኦሞ የዳንሰነች ማኅበረሰብ የኦርቶዶክስ ተዋሕዶ እምነትን በመቀበላቸው ጥምቀተ ክርስትና ተፈጸመላቸው

0669

መሠረቷ ብሉይ ኪዳን፣ ጉልላቷ ሐዲስ ኪዳን የሆነው የኢትዮጵያ ኦርቶዶክሳዊት ተዋሕዶ ቤተ ክርስቲያን ሕገ ኦሪትን በዘጠኝ መቶ ዓመተ ዓለም በቀዳማዊ ምኒሊክ አማካኝነት ተቀብላ አምልኮተ እግዚአብሔርን ስታስፋፋ ከቆየች በኋላ አዲስ ኪዳንን ደግሞ በ34 ዓመተ ምሕረት በጃንደረባው /ባኮስ/ አማካኝነት የተቀበለች ሲሆን ሥርዓተ ክህነትን በዘጠነኛው መቶ ክፍለ ዘመን በአባ ሰላማ ከሣቴ ብርሃን /ፍሬምናጦስ/ በኩል ተቀብላ ክርስትናን ስታስፋፋ ቆይታለች፡፡
ጌታችንና መድኃኒታችን ኢየሱስ ክርስቶስ በቅዱስ ወንጌል “አዝመራው ብዙ ነው ሠራተኞቹ ግን ጥቂቶች ናቸው የመከሩ ባለቤት ሠራተኛ እንዲጨምር ለምኑት” በማለት እንዳስተማረው ከሕገ እግዚአብሔር ርቀው፣ በተለይም እግዚአብሔርን በማምለክ ፈንታ ለድንጋዩና ለዛፉ እየተንበረከኩ እና እየሰገዱ የሚኖሩ የአዳም ዘሮች በርካታ ስለሆኑ ቤተ ክርስቲያን ወደ እነርሱ ሂዳ ወንጌልን መስበክ እንደሚገባት ይታመናል፡፡
እነዚህ ወንጌል ያልደረሳቸው የአዳም ዘሮች ከአፍሪካዊነታቸው ጋር የማይስማማ ብዙ የባህል ውጥንቅጥ ስላለባቸው ከዚያ ሁሉ ለመላቀቅ እንዲችሉ ቤተ ክርስቲያን የበኩልዋን ድርሻ መወጣት እንደሚገባት የታወቀና የተረዳነው፡፡
 ብፁዕ አቡነ ጎርጎርዮስ የኢትዮጵያ ኦርቶዶክስ ተዋሕዶ ቤተ ክርስቲያን ታሪክ በተሰኘው መጽሐፋቸው ገፅ 3 ላይ እንዳሰፈሩት “የኢትዮጵያ ኦርቶዶክስ ተዋሕዶ ቤተ ክርስቲያን ለኢትዮጵያ ሕዝብ ያበረከተቻቸው ስጦታዎች ብዙ ናቸው፡፡ ከእነዚህም መካከል ሙሉ ትምህርት፣ ፍጹም ቋንቋ ከነፊደሎች፣ ሥነ ጽሁፍ ከነጠባዩ፣ ኪነ ጥበብ በየዓይነቱ፣ ሥነ ጥበብ በየመልኩ፣ ታሪካዊና ጥንታዊ ቅርስ፣ እምነት ከነፍልስፍናው፣ ነፃነት ከነክብሩ፣ አንድነት ከነጀግንነቱ፣ አገር ከነድንበሩ፣ ስም ከነትርጉሙ” ብለው ጽፈዋል፡፡ አሁንም ቢሆን ትውልዱ ለሃይማኖት ተቆርቋሪነትን ይዞ እንዲያድግ በማስተማርና በማበረታታት ቤተ ክርስቲያን የበኩሏን ድርሻ እየተወጣች ትገኛለች፡፡
ከእነዚህም መካከል የአዲስ አበባ ሀገረ ስብከት በርዕሰ መዲናው የሚገኙትን የተለያዩ የብሔረሰቦች ሕዝቦችን በመንፈሳዊ አመራርና በስብከተ ወንጌል እንቅስቃሴ የላቀ አገልግሎት ሲያበረክት የቆየ ሲሆን ከዚህም ጎን የኢኮኖሚ እጥረት ባለባቸው ሌሎች አሕጉረ ስብከት ዘርፈ ብዙ የበጀት ድጋፍ ሲያደርግ የቆየ እና አሁንም በማድረግ ላይ የሚገኝ ነው፡፡ በተለይም ደቡብ ኦሞ እየተባለ በሚጠራው ዞን ሥር የሚገኙ አሥራ ስድስት ማኅበረሰብ ማለትም፡-
1.ሐመር             9. ፀማይ 
2.በነ                 10. ቦዴ
3.ኞንጋቶም         11. ካሮ
4.ዳንሰነች           12. ሱርማ
5.ሙርሲ             13. ባጫ
6.ኦሪ                 14. ዲሜ
7.ሚሊ               15. ሚርሌ
8.ኤሪቦሌ            16. ብራይሌ /ወይጦ/

0332

በሚገኙበት በረሃማና ደጋማ ቦታዎች የአብያተ ክርስቲያናት ግንባታ እና የአዳዲስ አማኞች ወደ ኦርቶዶክሳዊት ተዋሕዶ ሃይማኖት መምጣትና መጠመቅ ትልቁን ድርሻ ይዞ እየተጓዘ ያለው የአዲስ አበባ ሀገረ ስብከት መሆኑ በማንም ዘንድ አይዘነጋም፡፡
ለእነዚህ አምላክ የለሽ ሕዝቦች ወደ ክርስትና መምጣትና ከ38 ያላነሱ አብያተ ክርስቲያናት ግንባታ በዋነኛነት የማስተባበሩን አገልግሎት እያፋጠነ የሚገኘው የደቡብ ኦሞ የአብያተ ክርስቲያናት አሳፋሪ ኮሚቴ ሲሆን ሀገረ ስብከቱ የጽ/ቤቱ መገልገያዎች ከሆኑት ቢሮዎች መካከል አንድ ዘመናዊ ቢሮ በነፃ በመፍቀድ፣ በአዲስ አበባ ገዳማትና አድባራት እየተዘዋወረ የገንዘብ፣ የማቴሪያልና የቁሳቁስ እርዳታ እንዲጠይቅ የትብብር ደብዳቤ በመጻፍ፣ ኮሚቴው የተለያዩ ኢግዚቢሽኖችን እንዲአዘጋጅ መንግሥታዊ ለሆኑ እና መንግሥታዊ ላልሆኑ ተቋማት ጭምር የትብብር ደብዳቤ በመጻፍ እንደዚሁም ተጠማቂ ማህበረሰቦቹ ባሉበት ድረስ አገልጋዮችን በመላክ ሀገረ ስብከቱ መጠነ ሰፊ አገልግሎት ሲሰጥ ቆይቷል፡፡
በዚሁ መሠረት በዘንድሮው 2009 ዓ.ም ለዘጠኝ ተከታታይ ቀናት በተደረገው መንፈሳዊ ጉዞ በነምረሙዝ ኪዳነ ምህረትና በኦሞ ራቴ ቅዱስ ገብርኤል ቤተ ክርስቲያን ቁጥራቸው ከ3000 በላይ የሚገመት የዳንሰነች ማህበረሰብ የኢትዮጵያ  ኦርቶዶክስ ተዋሕዶ ቤተ ክርስቲያን ሃይማኖትን  አምነው በመቀበላቸው ሥርዓተ ጥምቀት ተፈጽሟላቸዋል፡፡

 
ብፁዕ ወቅዱስ አቡነ ማትያስ ቀዳማዊ ፓትርያርክ የ2009 ዓ.ም ጾመ ፍልሰታን አስመልክተው መልእክት አስተላለፉ

pp009

ቃለ በረከት ዘብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት ዘተናገረ በእንተ ጾመ ፍልሰታ ለማርያም ዘዕሥራ ምዕት ወተስዐቱ ዓመተ ምሕረት
በስመ አብ ወወልድ ወመንፈስ ቅዱስ አሐዱ አምላክ አሜን
+ በሀገር ውስጥና በተለያዩ ክፍለ ዓለማት የምትገኙ የመንፈስ ቅዱስ ልጆቻችን ሕዝበ ክርስቲያን በሙሉ!!
+ እኛን ለክብርና ለምስጋና የፈጠረ እግዚአብሔር አምላካችን እንኳን ለሁለት ሺሕ ዘጠኝ ዓመተ ምሕረት የጾመ ማርያም ሱባዔ በሰላም አደረሳችሁ!!
“ታዓብዮ ነፍስየ ለእግዚአብሔር፤ ነፍሴ እግዚአብሔርን ከፍ ከፍ ታደርገዋለች ” (ሉቃ ፩ ÷ ፵፯ )
ይህንን የምስጋና ቃል የተናገረችው ወላዲተ እግዚአብሔር ቃልና ማኅደረ መንፈስ ቅዱስ የሆነችው ቅድስት ድንግል ማርያም ናት፤
እመቤታችን ቅድስት ድንግል ማርያም ይህንን የአምልኮ ምስጋና ለእግዚአብሔር ስታቀርብ እርሱ ያደረገላትን ሦስት ዓበይት ምክንያቶች በመጥቀስ እንደሆነ ከቅዱስ መጽሐፍ እናስተውላለን፡፡
እመቤታችን ይህንን ምስጋና ከማቅረቧ በፊት እግዚአብሔር ለታላቅ በረከትና ለፍጹም ደስታ እንደመረጣት፣ የእርሱ ባለሟልና ምልእተ ጸጋ እንዳደረጋት፣ ቅዱሱን የእግዚአብሔር ልጅ በመንፈስ ቅዱስ ፀንሳ እንደምትወልድና እግዚአብሔር ከእርሷ ጋር እንደሆነ በመልእክተኛ በቅዱስ ገብርኤል በኩል ነግሮአታል፡፡
እርሷም በቅዱስ ገብርኤል በኩል የተላከላትን የእግዚአብሔር ቃል ተቀብላ እነሆ የእግዚአብሔር ባሪያ ነኝ እንዳልከኝ ይሁንልኝ በማለት በታዛዥነትና በትሕትና ለደረሳት መለኮታዊ ጥሪ ተገቢውን የይሁንታ መልስ ሰጥታለች፡፡
በዚህ ጊዜ ቀዳማዊ ወልደ እግዚአብሔር በግብረ መንፈስ ቅዱስ ከቅድስት ድንግል ማርያም   ከሥጋዋ ሥጋ ከነፍስዋ ነፍስ ነሥቶ ራሱን በማዋሐድ የዕለት ፅንስ ሆኖ በማኅፀንዋ አደረ፡፡
ጌታችን አምላካዊ ማንነቱን መግለጽ የጀመረው ከማኅፀን አንሥቶ ነውና እመቤታችን እሱን ፀንሳ ሳለች ኤልሳቤጥን እንዴት ነሽ ብላ የሰላምታ ድምፅን ስታሰማት በማኅፀነ ኤልሳቤጥ ያለው ፅንስ በማኅፀነ ማርያም ላለው ፅንስ በደስታ ሰግዶአል፡፡
ይህ አምላካዊ ምሥጢር በድንግል ማርያም ማኅፀን ውስጥ ያለው ፅንስ የአምልኮ ስግደት የሚገባውና ሁሉን የፈጠረ፣ ሁሉንም ማድረግ የሚችል የባህርይ አምላክ መሆኑን አሳይቶአል፡፡
ይህ ብቻም አይደለም የቅድስት ድንግል ማርያም የሰላምታ ድምፅ በኤልሳቤጥ ጆሮ በተሰማ ጊዜ በማኅፀንዋ ያለ ፅንስ በደስታ ሲሰግድ፣ በዚያ ቅፅበት ኤልሳቤጥ በመንፈስ ቅዱስ ተሞልታ እግዚአብሔር በቅዱስ ገብርኤል በኩል የገለፀውን የእመቤታችን ክብርና ጸጋ፣ በረከትና ብፅዕና፣ የጌታ እናትነትና ባለሟልነት፣ የልጇ በረከትና አምላክነት በኤልሳቤጥ አንደበትም በድጋሚ  እንዲነገር ማድረጉ የነገሩ ክብደትና ታላቅነት ምን ያህል እንደሆነ እንዲታወቅ አስችሎአል፡፡
እግዚአብሔር መንፈስ ቅዱስ በቅዱስ ገብርኤልና በቅድስት ኤልሳቤጥ በኩል ስለ እርስዋ መናገሩና የእግዚአብሔር ወልድ በማኅፀኗ ማደሩ በዚህ ሁሉ እጅግ በጣም ከኃይል ሁሉ የበለጠ ታላቅ ኃይል በእርስዋ ላይ እንደተደረገ እመቤታችን በሚገባ አውቃለች፡፡ 
ይህ እጅግ በጣም ታላቅ የሆነ ጸጋ ለሰው ልጅ ሁሉ የሚተርፍ ልዩ በረከትና የእግዚአብሔር የማዳን ቁልፍ ተግባር እንደሆነ ለማመልከትም ካንቺ የሚወለደው ሕዝቡን ከኃጢአታቸው የሚያድናቸው ስለሆነ ስሙ ኢየሱስ ትይዋለሽ ተብሎ በመልአኩ ተነግሮአታል፤ እርስዋም አምና ተቀብላለች፤
ለዚህ ታላቅ በረከትና መዳን በመሣሪያነት እርሷ መመረጥዋንም ልዩ ዕድል መሆኑን አልዘነጋችም፡፡
 እንግዲህ እነዚህ ዓበይት ነገሮች በእመቤታችን አእምሮ ውሰጥ ከፍተኛ ስፍራ ነበራቸውና ያለ ምስጋና ልታልፋቸው አልፈለገችም፡፡
በመሆኑም የሆነው ነገር በሙሉ ለእርስዋና ለሰው ልጆች ሁሉ መሆኑን በሚገልጽ ኃይለ ቃል የአምልኮ ምስጋናዋን ለፈጣሪዋ ለእግዚአብሔር ግሩም በሆነ ሁኔታ አቅርባለች፡፡
በምስጋናዋም “ነፍሴ እግዚአብሔርን ከፍ ከፍ ታደርገዋለች፤ መንፈሴም በአምላኬና በመድኃኒቴ ደስ ይላታል፤ የባርያይቱን ውርደት አይቶአልና፤ እነሆ ከዛሬ ጀምሮ ትውልድ ሁሉ ብፅዕት ነሽ ይሉኛል፤ እርሱ ታላላቅ ሥራዎችን ሠርቶልኛልና” የሚል ጥልቅ ምሥጢር ያለው ኃይለ ቃል ይገኝበታል፡፡
ይኸውም “ብዙኃ አበዝኆ ለሕማምኪ ወለፃዕርኪ፤ በሕማም ለዲ፤ ምጥሽን ጣርሽን እጅግ አበዛዋለሁ፤ በጭንቅም ትወልጂያለሽ የሚል መርገም ተሸክማ በመከራ የኖረችውና ይህንን መከራ ለልጆችዋ ያወረሰችው ሔዋን በእርስዋ ጊዜና መሣሪያነት ከመርገም ተላቃ ወደ ገነት የምትመለስበት ጊዜ እየተቃረበ መምጣቱን ስታመለክት የባርያይቱን ውርደት ተመልክቶአልና ነፍሴ እግዚአብሔርን ከፍ ከፍ ታደርገዋለች በማለት አመሰገነች፡፡
የሰው ልጅን በአጠቃላይ ከገጠመው ውድቀት ለመታደግ እግዚአብሔር በጀመረው ነገረ አድኅኖ ከኃይል ሁሉ የበለጠ ኃይል እግዚአብሔር ወልድ በማኅፀኗ ማደሩ፣ እንደዚህም እርስዋ ለዚህ የበቃች ቅድስት፣ ንጽሕት፣ ቡርክት፣ ልዕልት፣ ብፅዕትና ከሴቶች ሁሉ የተለየች ምልእተ ጸጋ፣ ሙኃዘ ፍሥሐ፣ የእግዚአብሔር ልዩ ባለሟልና የመንፈስ ቅዱስ ማደሪያ አድርጎ መምረጡንና ማክበሩን ሁሉ ለእርስዋ የተደረጉ ታላላቅ ነገሮች መሆናቸውን በመገንዘብዋ እመቤታችን ታላላቅ ሥራዎችን ሠርቶልኛልና መንፈሴ በአምላኬና በመድኃኒቴ ደስ ይላታል በማለት ፈጣሪዋን አመስግናለች፡፡
ከዚህም አይይዛ በእግዚአብሔር መልእክተኛ በቅዱስ ገብርኤልና መንፈስ ቅዱስ በሞላባት በቅድስት ኤልሳቤጥ የተገለፀውን ቅድስናዋና ብፅዕናዋ ዘመንና የስሑታን ትምህርት ሳይገቱት ከትውልድ ወደ ትውልድ ሳይቋረጥ እንደ ወራጅ ውሀ  እስከ ዕለተ ምጽአት እንደሚነገርና እንደሚተገበር በመንፈስ ቅዱስ ተቃኝታ ተናግራለች፤
ቤተ ክርስቲያናችንም የእመቤታችንን ብፅዕና አክባሪና ከአማላጅነቷ ተጠቀሚ ሆና መገኝቷ የእግዚአብሔርን ፈቃድ በደምብ ያወቀችና ቃሉን  በምልአት የተቀበለች መሆኗን ያረጋግጣል፡፡
የተወደዳችሁ የመንፈስ ቅዱስ ልጆቻችን ምእመናንና ምእመናት
ከቅድስት ድንግል ማርያም የምስጋና ቃል የምንማረው ብዙ ትምህርት እንዳለ ማስተዋልና መገንዘብ ተገቢ ነው፡፡
ከሁሉ በፊት ስለ ቅድስት ድንግል ማርያም የተነገሩ ነገሮች በሙሉ ከፍጡራን መንጭተው የተነገሩ ሳይሆኑ ከእግዚአብሔር በቀጥታ ከተላከው መልአክ ከቅዱስ ገብርኤል፣ መንፈስ ቅዱስ ከሞላባት ከቅድስት ኤልሳቤጥና እንደዚሁም መንፈስ ቅዱስ ባንቺ ላይ ይመጣል ከተባለላት ከቅድስት ድንግል ማርያም የተነገሩ በመሆናቸው ምንጫቸውና ተናጋሪያቸው ራሱ እግዚአብሔር እንደሆነ መገንዘቡ አያዳግትም፤
ምክንያቱም ተላኪ የላኪውን፣ መንፈስ ቅዱስ ያደረበት የመንፈስ ቅዱስን ቃል እንደሚናገር ለሁሉም ግልጽ ነውና፤ ቅዱስ መጽሐፍም እነዚህን በጥንቃቄ መዝግቦ መገኘቱ ይህንን እንድንገነዘበው ብሎ እንደሆነ ጥርጥር የለውም፡፡
ከዚህ አንጻር እግዚአብሔር ራሱ በፍጹም ክብር ያከበራትንና ትውልድ ሁሉ ብፅዕት ነሽ እያሉ እንዲያመሰግኗት በቅዱስ መንፈሱ ያናገረላትን ቅድስት ደንግል ማርያምን ማክበርና ማመስገን፣ ብፅዕናዋንና ቅድስናዋን ማመን፣ መስበክና ማሰተማር የእግዚአብሔርን ቃል በትክክል ተረድቶ ለቃሉ መታዘዝና ለተግባራዊነቱ መቆም እንደሆነ ለሕዝበ ክርስቲያን ሁሉ ግልጽ ሊሆንለት ይገባል፡፡
ቅድስት ድንግል ማርያም እግዚአብሔር ላደረገላት ታላቅ ነገር ሁሉ ምስጋናን አምልኮትንና ምስክርነትን በመስጠት ለእኛ መልካም አስተማሪና አርአያ መሆኗን ማስተዋል ከሁላችንም ይጠበቃል ፡፡
ሁላችንም ልብ ብለን ካየነው እግዚአብሔር ለሰው ልጅ በአጠቃላይ ታላላቅ ሥራዎችን ያልሠራበት ቀን አይገኝም፤ ነገር ግን በየጊዜው ለሠራልን ሥራዎች ተገቢ ዕውቅና በመስጠትና በመመስከር እንደ ቅድስት ድንግል ማርያም በደስታ የአምልኮ ምስጋናን ለእግዚአብሔር የሚያቀርቡ ስንት ናቸው?  የሚለውን ጥያቄ ብናነሣ መልሱ አስቸጋሪ ሳይሆን አይቀርም፤
ነገር ግን ድሮም የተፈጠርነው ለምስጋና ነውና እግዚአብሔር  ያለሟቋረጥ ሁሌም ታላላቅ ነገሮችን እየሠራልን እንደሆነ አውቀንና አምነን ለእርሱ የሚገባ የአምልኮ ምስጋና ልናቀርብ ይገባል፡፡
ከዘመነ ሐዋርያት ጀምሮ በቀኖና ጸድቆ በጥንታውያንና በኦርቶዶክሳውያን አብያተ ክርስቲያናት ሁሉ እየተፈጸመ የሚገኘው የቅድስት ድንግል ማርያም ጾመ ፍልሰታ ዓላማም፣ እግዚአብሔርን በምስጋና በቅዳሴ በውዳሴ ለማምለክ፣ ለቅዱስ ቃሉ ፍጹም ታዛዥ በመሆን ምሥጢረ ቊርባንን ለመቀበልና ከኃጢአት ሸክም ተላቀን ከእግዚብሔር ጋር የጠበቀ ግንኙነት ለመፍጠር ነው፡፡
የተወደዳችሁ የመንፈስ ቅዱስ ልጆቻችን ምእመናንና ምእመናት
በዘመነ ብሉይም ሆነ በዘመነ ሐዲስ የእግዚአብሔር ሞገስና ጸጋ አግኝተው ለቅድስና ደረጃ የበቁ ቅዱሳን ሁሉ ጸሎታቸውና፣ ተማኅጽኖአቸው ለራሳቸው ብቻ ሳይሆን ለዓለሙ ሁሉ እንደሚተርፍ ቅዱስ መጽሐፍ በትምህርትም ሆነ በተግባር ያረጋገጠውና የመዘገበው ነው፡፡
ይልቁንም “እስመ ረከብኪ ሞገሰ በኀበ እግዚአብሔር ከእግዚአብሔር ዘንድ ባለሟልነትን አግኝተሻልና ምልእተ ጸጋ ነሽ፤ደስ ይበልሽ ብሎ እግዚአብሔር በመልእክተኛው ያረጋገጠላት ቅድስት ድንግል ማርያም ባላት ከፍተኛ የእግዚአብሔር ባለሟልነት በጸሎቷ በአማላጅነቷና ወደ እግዚአብሔር በምታቀርበው ተማኅፅኖ ግዳጃችንን እንደምትፈጽም የቃና ዘገሊላው ምልጃዋና የተገኘው በረከት በቂ ማስረጃችን ነው፡፡
በመሆኑም የጾመ ፍልሰታ ሱባዔ እግዚአብሔርን በአባትነት፣ ቅድስት ድንግል ማርያምን በእናትነት የምናገኝበት ልዩ ወቅት በመሆኑ እግዚአብሔር በቃሉ የተናገረውን በመከተልና እንደ ቃሉ በመመላለስ ጾሙን ልንጾም ይገባል፡፡
ከሁሉ በላይ ደግሞ ፍቅርና ሰላም፣ መተጋገዝና መረዳዳት፣ ንሥሐና ጸሎት፣ ቅዱስ ቊርባንን መቀበልና ሰውን ሳይሆን እግዚአብሔርን በማዳመጥና በመከተል መጾም ይኖርብናል፡፡
ይህ ጾም የሀገራችንን አንድነትና ነጻነት፣ የሕዝባችንን አብሮነትና የእርስ በርስ መተሳሰብ፣ እግዚአብሔርን የመፍራትና ድንግል ማርያምን የመውደድ፣ ሃይማኖታዊና ኢትዮጵያዊ ዕሴቶችን ሁሉ አዳብሮ ጥሩ ሰብእና ያለው ማኅበረ ሰብን ያፈራ፣ እንደ አሸንዳ የመሳሰሉ ሃይማኖታዊና ሀገራዊ ባህሎችን የገነባ ጾም ስለሆነ፣ ለሃይማኖታችን መጠበቅ፣ ለሀገራችን መልካም ገጽታ ግንባታና ለልማት መፋጠን እንደዚሁም ለቱሪዝም ክፍለ አኮኖሚ መበልፀግ የሚሰጠው ጥቅም ከፍተኛ ስለሆነ ሃይማኖታዊ፣ ባህላዊና ሀገራዊ ይዘቱ ተጠብቆ እንዲቀጥል ኢትዮጵያዊ የሆነ ሁሉ የበኩሉን ሊወጣ ይገባል፡፡
በመጨረሻም
የጾም ወቅት ምእመናን ከእግዚአብሔር ጋር የሚገናኙበት፣ ርኅራኄና አዘኔታ ለሰው ልጅ ሁሉ የሚያደርጉበት እንደመሆኑ መጠን፣ ምእመናን እጆቻቸውን ለተቸገሩ ወገኖች እንዲዘረጉ፣ ስለ ሀገርና ስለ ዓለም ሁሉ ሰላም መጠበቅ ወደ እግዚአብሔር ጸሎት እንዲያቀርቡ፣ በሀገራችን እየተካሄደ ያለው ዙሪያ መለስ የልማትና የዕድገት ሽግግር እንዲሠምር በፍቅርና በሰላም ቆመው በአንድነት ጸሎታቸውን ሁሉን ወደሚችል ወደ ኃያሉ እግዚአብሔር ለማቅረብ እንዲተጉ አባታዊ መልእክታችንን በእግዚአብሔር ስም እናሰተላልፋለን፡፡
ወትረ ድንግል ማርያም
እግዚአብሔር አምላክ ኢትዮጵያንና ሕዝባችንን ይባርክ ይቀድስ
ወስብሐት ለእግዚአብሔር አሜን

አባ ማትያስ ቀዳማዊ
 ፓትርያርክ ርእሰ ሊቃነ ጳጳሳት ዘኢትዮጵያ
 ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት
ነሐሴ ፩ ቀን ፳፻ወ፱ዓ.ም.

 
የአዲስ አበባ ሀገረ ስብከት የ2009 ዓ.ም በሰባቱ ክፍላተ ከተማ ዓመታዊ የሥራ ግምገማ አካሄደ

a0017

ሀገረ ስብከቱ ከሰባቱ ክፍላተ  ከተማ ቤተ  ክህነት የሥራ ኃላፊዎችና ሠራተኞች ጋር  በ2009 ዓ.ም የበጀት ዓመት የተከናወኑትን የልማትና የፐርሰንት ገቢ አስመልክቶ ሐምሌ 28 ቀን 2009 ዓ.ም ባደረገው አጠቃላይ ዓመታዊ ሪፖርት ላይ የተመሠረተ የምክክርና የመገማገም ሥራ  አከናውኗል፡፡
ሀገረ  ስብከቱ  በዚሁ ወር መግቢያ  በፐርሰንት  አሰባሰብ ዙሪያ  ሰፋ  ያለ  ውይይት  እና  ግምገማ ያካሄደ መሆኑ  ይታወቃል፡፡ በሰባቱም  ክፍላተ ከተማ  በየተራ  ከአድባራትና ገዳማት የሥራ ኃላፊዎችና  ሠራተኞች ጋር   ለሙሉ ቀን የቆየ  የምክክር እና  ግምገማ  ጉባኤ  አካሂዷል፡፡
በሁሉም ክፍላተ ከተማ በተደረገው  ዐቢይ  የምክክር እና የመገማገም  ጉባኤ የተነሱ ሀሳቦችን በተመለከተ  በአሠሪና  ሠራተኛ መካከል የሚፈጠረው  ችግር፣ የስብከተ  ወንጌል እንቅስቃሴ  መዳከም፣ የአብያተ ክርስቲያናት ይዞታ ጉዳይ፣ የፐርሰንት  ክፍያ፣ የህገ ወጥ  ሰባክያን  የአድማ ቅስቀሳ፣ የምዕመናን ቁጥር  መቀነስ እና የመናፍቃን ወረራ ተግባር በዋናነት  የተጠቀሱ ሲሆን እነዚህን ዘርፈ ብዙ  ችግሮች  ለማስወገድ አሠራሮችን ማስተካከል  ይገባናል  ብለዋል፡፡ የጉባኤያቱ  ዋና መሪና አስተባበሪ የሆኑት መምህር  ጎይቶም  ያይኑ በሰጡት  ሐሳብ ሕገ ወጥ  ሰባኪያን  በዐውደ ምህረት ቆሞ ለመስበክ በመጀመሪያ ፈቃድ ሊኖረው  ይገባል፡፡
የቤተ ክርስቲያን አባል ያልሆኑ እና የቤተ ክርስቲያን ተቆርቆሪ  ያልሆኑ ሰዎች  ክትትል ሊደረግባቸው ይገባል፤ በቲፎዞ ምክንያት ጠቃሚ የሆኑ  ሰዎችን  እያጣን  ስለሆነ  ይህንን አሠራር  መፈተሽ  አለብን፤ አደገኛ  የሆነ  አስተሳሰብ  እየመጣ ነው፡፡ ከሕዝብ  ተለይተው  ብቻቸውን  የሚኖሩ  አሉ፤ ብዙ  ተከታይ ካፈሩ በኋላ ከመድረክ ቢወርዱም  በሕዝብ  ልብ  ውስጥ ጠልቀው ገብተዋልና በእንቃሴያቸው ዙሪያ ሊታሰብበት  ይገባል፡፡
ስለምዕመናን ቁጥር መቀነስ በተለያየ መልኩ ይነሳ  እንጂ ምን ያህል ቁጥር እንደቀነሰ በትክክል ማወቅ  ይገባል፡፡ በአሠራር ብልሽት  እና በኢኮኖሚ ጫና ያጣናቸው ሰዎች ሊኖሩ  ይችላሉ፡፡ በአንጻሩ ቤተ ክርስቲያን ሠርተው የሚያስረክቡ ምዕመናንም አሉ፡፡
በአጠቃላይ ስንመለከት  ግን ሥራችንን  በአግባቡ  መሥራት አለብን፡፡ የሚጠበቅብንን የሥራ ድርሻ መወጣት  አለብን፡፡ ሐሳባችን  የጥቅም ጉዳይ አይሁን፡፡ በአግባቡ  ሠርተን  በአግባቡ ልንጠቀም  እንችላለን፡፡ የቤተክርስቲያን ገንዘብ  በአግባቡ  ገብቶ  በአግባቡ መውጣት አለበት፡፡  ስለምንሠራው ሥራ አስቀድሞ  መረጃ  ሊኖረን  ይገባናል፡፡
ለሥራው የሚመጥን ሠራተኛ ከሥራው ጋር ማገናኘት አለብን፡፡ ስለ ውሉ  ስለጨረታው  በቁርጠኝነት መሥራት አለብን፡፡ ሁላችንም  በአንድ ልብ  መሥራት  ካልቻለን  መሪው  ብቻውን የሚያመጣው  ለውጥ የለም፡፡ ሕዝቡና ካህናቱ ችግር  አለ እያሉ እየጮሁ የሚቀርበው ሪፖርት  ግን  ከዚህ  የተለየ ሊሆን አይገባም፡፡
የገዘፈ ችግር ካለ እርምጃ መውሰድ የግድ ነው፡፡ አለቃም ሆነ ጸሐፊ የገዘፈ ችግር  ካለባቸው ወደታች አውርዶ ማሠራት የግድ ነው፡፡ በቀረበው ሪፖርት መሠረት የተቀጣ ሰው በጥፋቴ ነው ብሎ ሊፀፀት ይገባዋል፡፡ ሠራተኛው በአንድ ቦታ ችግር ሲፈጥር ወደሌላው ቦታ  ይዛወራል፡፡ ይህ ግን  መፍትሔ  ሊሆን አይችልም፡፡
ቤተ ክርስቲያን ውስጥ ያለው ችግር ሊፈታ የሚችለው በሰበካ  ጉባኤ ነው፡፡ ሰበካ ጉባኤ  ሊጠናከር ይገባዋል  በወገንተኝነት  የሚሠራ  የሕዝብ  ተወካይ ሊኖር አይገባም፡፡ በምዝገባ ጊዜ ክትትል ሊደረግ ይገባል፡፡ በካርድ ስለተመረጠ ትክክለኛ ኮሚቴ ተመረጠ ማለት አይደለም፡፡ በየዓጥቢያው የተሟላ የሰበካ ጉባኤ አባል መኖር አለበት፡፡
የተመረጡት  የሰበካ ጉባኤ አባላትም መብታቸውንና ግዴታቸውን ማወቅ አለባቸው፡፡ ሀገረ ስብከቱ ለወደፊቱ ከሰበካ ጉባኤ አባላት ጋር የመመካከር እና የውይይት ተግባር  ያካሂዳል  በየክፍላተ ከተሞች  ባደረግነው  የምክክርና  የመገማገም ጉባኤ እንደተረዳነው በሰበካ  ጉባኤው እና በካህናት መካከል  ተግባብቶ መሥራት  አይታይም፡፡ በአብዛኛው  አብያተ ክርስቲያናት ዘንድ  የሰበካ  ጉባኤ አባላት  የአገልገሎት  ዘመናቸውን ሲጨርሱ ተመስግነው አይወርዱም፡፡
ይህም የሚያሳየው ያሳለፉት የሥራ ዘመን ባለመግባባት ስለሚሰራ ነው፡፡  በአንድ አንድ አበያተ ክርስቲያናት ከሰበካ ጉባኤ አባላት ጋር የሚፈጠረው  ችግር  የቤተ ክርስቲያን  ሀብት  ከመጠበቅ አንጻር ነው፡፡ ይህ አይነት የምክክርና የመገማገም ሥራ በየስድስት ወራት ሊቀጥል  ይችላል በማለት መምህር  ጎይቶም ያይኑ መልእክታቸውን  ካስተላለፉ በኋላ ለሙሉ ቀን ያህል ሲካሄድ የዋለው የምክክር እና የመገማገም ጉባኤ ባለ26 ነጥብ የአቋም መግለጫ  እንደሚከተለው ቀርቧል፡፡
                የአቋም መገልጫ
የአዲስ አበባ ሀገረ ስብከት  በ2009 ዓ.ም  የበጀት ዓመት  በየክፍላተ  ከተማ ቤተ ክህነት  በበጀት ዘመን ሲከናወኑ የቆዩትን ተግባራት በየክፍለ ከተማው ሲገመግም ከቆየ በኋላ    የዓመቱን ማጠቃለያ በአዲስ አበባ  ሀገረ  ስብከት  ዋና ሥራ  አስኪያጅ  በመምህር  ጎይቶም  ያይኑ  ሰብሳቢነት በክፍለ ከተማ  ቤተ ክህነት  ሥራ አስኪያጅ  የቢሮ ኃላፊዎችና ሠራተኞች በሙሉ  በየክፍላተ ከተማ ቤተ ክህነት የቀረበውን  ሪፖርት  በማዳመጥ እጅግ  ጥቅልና  አመርቂ ውይይት  ከተደረገ በኀላ  የሚከተለውን የጋራ  የአቋም መግለጫ አውጥተናል፡፡
1.በየክፍላተ ከተማው አድባራትና  ገዳማት ሲደረግ የነበረው ውይይት አመርቂና ውጤታማ  በመሆኑ  ቀጣይነት  እንዲኖረው አስፋላጊውን  ትብብር እናደርጋለን፡፡
2.ከሪፖርቱ በቀረበው መሠረት ጠንካራ ጎን በመውሰድ ለቀጣይ ዓመት  የበለጠ እንዲሠራ አስፋላጊውን እንቅስቃሴ ለማድረግ ቃል እንገባለን፡፡
3.ስብከተ ወንጌልን በተመለከተ ያሉት እንቅስቃሴዎች መልካም ቢሆኑም ወቅቱን የጠበቀና ሀገረ ስብከቱ በሚያስተላልፈው መመሪያ ተመርኩዘን  ካለፈው በተሻለ  እንቅስቃሴ እንዲደረግ  ተግተን  እንሠራለን፡፡
4.ትምህርት ወንጌል ከቤተ ክርስቲያን፣ ከከፍለ ከተማውና ከሀገረ ስብከቱ ዕውቅና  ውጪ የሚንቀሳቀስውን አካል በተመለከተ ክትትል ተደርጎ ትክክለኛ አስተምህሮ እንዲሰፍን  ለማድረግ ቃል እንገባለን፡፡
5.ሰበካ ጉባኤን በሚመለከት ሀገረ ስብከቱ ያስተላለፈው መመሪያ እንዲከናወን መደረጉ አግባብና ውጤት ያለው በመሆኑ በቀጣዩም ተጠናክሮ እንዲቀጥልተግተን እንቀጥልበታለን፡፡
6.ተመራጭ  የሰበካ ጉባኤ አባላት ከተመረጡ  በኋላ  ስልጠና  እየተሰጣቸው ወደ ሥራ  እንዲገቡ  ለማድረግ  ተግተን  እንሠራለን፡፡
7.የልማት ሥራን  በተመለከተ የሚታዩት ጅምሮች፣ በጎ ቢሆኑም ግልጽነት ባለው አሠራርና በጨረታ ሂደቱም  በጥንቃቄ  እንዲከናወን ሕጉን ጠብቆ እንዲሠራ ለማድረግ ቃል እንገባለን፡፡
8.በበዓላት የሚገኙ ገቢዎችንና ንዋየተ ቅድሳት በሚመለከት  ከሀገረ ስብከቱ  በሚወጣው  መመሪያ  መሠረተ  የጨረታ ሂደቱን፣  የሙዳየ ምጽዋት  ቆጠራውን  በሕጉ መሰረት  እንዲከናወን  ለማድረግ  ቃል እንገባለን፡፡
9.ቤተ ክርስቲያን እስከ ዛሬ ድረስ በመጣችበት የታሪክ ጉዞዋ  ሁሉ ምሰሶ በመሆን  ለዛሬ ያበቁዋት  ሊቃውንት አግባባዊ ክብር  እንዲሰጣቸው ለማድረግ ቃል  እንገባለን፡፡
10.ቤተ ክርስቲያን በቱሪስት መስህብ ልታገኝ የሚገባትን ገቢ ከፍ ያለ እንዲሆን ለማድረግ ቃል  እንገባለን፡፡
11.የ2009 ዓ.ም  የበጀት ዘመን የገቢው አሰባሰብ የተሳካ እንዲሆን ከሀገረ ስብከቱ ዋና ሥራ አስኪያጅ  የተሰጠውን ስልትና መመሪያ በመከተል ከወትሮው  በተለየ መልኩ  የተገኘው  ለውጥ  እጅግ ከፍተኛ  በመሆኑ  በሚቀጥለው  የ2010 ዓመተ  ምህረት  የበጀት ዓመት  በተሻለ አሠራር  ለመቀጠል ቃል እንገባለን፡፡
12.ካህናቱ የንሰሀ ልጆቻቸውን በትምህርተ ሃይማኖት  የሚይዙበትን ስልት  በመቀየስ አስፈላጊውን ስልጠና እንዲያገኙ  ለማድረግ ተግተን እንሠራለን፡፡
13.የሰንበት ት/ቤት ወጣቶች በቤተ ክርስቲያን ትምህርት እየተኮተኮቱ እንዲያድጉ  የእዝ ሰንሰሉትን በመጠበቅ ከማኅበራትም ጫና እንዲላቀቁ በማድረግ እና ተጠናከሮ  እንዲቀጥሉ  ለማድረግ ቃል እንገባለን፡፡
14.በሀገረ ስብከቱ ተጀምሮ ሲሠራ የቆየው ስልጠና ቀጣይነት እንዲኖረው የበኩላችንን ጥረት አናደርጋለን፡፡
15.የሚተከሉት አዳዲስ አብያተ ክርስቲያናት ከተሠሩ በኀላ እንዳይፈርሱ አስፋላጊውን ጥንቃቄ በማድረግና ከሚመለከተው አካላት ጋር በመነጋገር ተፈጻሚነት እንዲአገኝ ለማድረግ ቃል እንገባለን፡፡
16.የቤተ ክርስቲያን ይዞታ ካርታ ያላገኙ አድባራትንና ገዳማትን  ካርታ  እንዲያገኙ እና በጥቅምተ ባህር  የማደሪያ ይዞታዎች እንዲከበሩ  ለማድረግ ቃል እንገባለን፡፡
17.በቤተ ክርስቲያን ስም በመደራጃት በፉካና በጉዞ ማኅበራት የተሰማሩ አካላት ቤተ ክርስቲያን ማግኘት  የሚገባትን ገቢ ሳይሰጡ ለግል ጥቅማቸው እያዋሉ ስለሆነ ይህ ድርጊት ለወደፊቱ በቤተክርስቱያኑ ብቻ እንዲሠራ ለማድረግ የበኩላችንን ድርሻ እንወጣለን፡፡
18.በዘንድሮው የበጀት ዘመን  ገቢ በከፍተኛ ደረጃ ዕድገቱ እንዲመዘገብ ያደረገው  የሀገረ  ስብከቱና የየክፍላተ ከተማ ቤተ ክህነት ሠራተኞች ያላሳለሰ  የሥራ  ክትትል በመሆኑ የሠራተኛው ደመወዝና ጥቅማቸውም እንዲስተካከል ጉዳዩ የሚመለከተውን አካል  በአክብሮት  እንጠይቃለን፡፡
19.የክፍላተ ከተማ ቤተ ክሀነተ  አሁን ባለው አካሄድ እየተጠቀሙበት ያለው ቢሮ የሀገረ ስብከቱን ወጪ እያስወጣ በመሆኑ የራሳችንን ቢሮ ለማሠራት የበለጠ ተግተን እንሠራለን፡፡
20.ያለበጀት ከሥራ ማስኬጃና ከደመወዝ ውጪ በልዩ ልዩ ምክንያት  የሚወጣው ወጪ  የቤተ ክርስቲያናችን ኢኮኖሚ  በእጅጉ እየጎዳው በመሆኑ በፀደቀው  በጀት ብቻ እንዲመራ ለማድረግ ቃል እንገባለን፡፡
21.በወርኃዊና ዓመታዊ ክብረ  በዓላት  ላይ  ማንንም ሳያስፈቅዱ  በወንጌል አገልገሎት በቅዳሴ ጊዜ በየመግቢያው ላይ ልዩ ልዩ ሸቀጣሸቀጦችን በማቅርብ ወከባ በሚፈጥሩት ወገኖች ላይ  አስፋላጊውን ቁጥጥር ተደርጎ እንዲወገዱ ለማድረግ የበኩላችንን ጥረት እናደርጋለን፡፡
22.ከቤተ ክርስቲያኗ ወጥተው እየሄዱ ያሉ  ምስጢራትን ከመጠበቅ አኳያ ምዕመናንን  በመጠበቅ ጉዳይ ላይ  ትኩረት ሰጥተን እንሠራለን፡፡
23.የሀገረ ስብከቱ ዋና ሥራ አስኪያጅ  በማጠቃለያ ንግግራቸው በአዲስ አበባ  የተፈጠረው የመደማመጥ፣ የመረጋጋትና ፍትሐዊ አስተዳደር ወደላቀ ደረጃ ለማሸጋገርና ሥር ነቀል  ለውጥ ለማምጣት የበኩላችንን ድርሻ እንወጣለን፡፡
24.ምዕመናን ስለመጽሐፍ ቅዱስ ያላቸው ግንዛቤ ዝቅተኛ ስለሆነ የተሻለ ሥራ  በመሥራት በንሰሀ  አባቶቻቸው አማካኝነት  ትምህርቱ እንዲሰጣቸውና የምዕመናን ቁጥር ምን ያህል እንደደረሰ አስፋላጊውን አቅጣጫ ለመቀየስ ቃል እንገባለን፡፡
25.በበጀት ዓመቱ  የተከናወኑ አበይት  ተግባራት እጅግ በጣም የሚበረታቱ መሆናቸውን በበጀት ዓመቱ ማጠቃለያ በየክፍላተ ከተሞች የተደረገውን ውይይት የዛሬውን አጠቃላይ የሥራ ግመገማና ውይይት እያደነቅን ቀጣይነት እንዲኖራቸው እያሳሰብን ሌት ተቀን ተግተን ለመስራት ቃል እንገባለን፡፡

 
<< ጀምር < ወደኋላ 1 2 3 4 5 6 7 8 9 10 ወደፊት > መጨረሻ >>

ገጽ 6 ከ 107

አድራሻ

አዲስ አበባ ፤ ኢትዮጵያ

ኢ-ሜይል: aadioces@gmail.com

ድረ ገጹ ውስጥ ይፈልጉ

ሀሳበ ባሕር(የዘመን ቁጥር)

ባሕረ ሐሳብ የዘመን መቁጠሪያ

ግጻዌ